Mông jơnum pơtŏng glăi, lu bruă ngă kaih yua hơmâo lu phun tơhnal mơn. hrơi blan rơgao, Ding jum kơđi čar, Khul khua gum bruă git gai ping gah hăng Khua git gai Ping gah ơi Tô Lâm git gai črâo bruă na nao kiăng dưi mă yua djŏp tơlơi hơmâo pioh ngă bruă, hŭi prai lui gơnam tam kơnuk kơna, anom bơwih ƀong hăng mơnuih ƀôn sang.

Pơtum glăi ƀơi mông jơnum, Khua dêh čar ơi Phạm Minh Chính lăi hơdôm tơlơi pơgôp hiăp anai tơpă sit, djơ̆ hăng tơlơi kiăng. Khua dêh čar kiăng hơdôm ding jum, anom bruă, tơring čar lăng glăi, kah pơpha hăng ba tơbiă hơdră ngă bruă djơ̆ hăng tơlơi dưi. Hơdôm bruă mơ̆ ƀu dưi pơsir khŏm lăi pơthâo tañ hăng gưl prong dong. Bruă pơsir anai khŏm djơ̆ mơnuih, djơ̆ bruă, lăp djơ̆ hăng tơlơi pơkă mơ̆ng Ping gah hăng tơlơi phiăn mơ̆ng Kơnuk kơna, gum ba hơdôm kơčăo bruă tañ dưi mă yua, pơtrut đĭ kyar bơwih ƀong huă - mơnuih mơnam./.