Sang jơnum Anom bruă tơhan pôlih Wai lăng hră pơ-ar hăng Hơđong rơnuk rơnua mơnuih ƀôn sang (mrô 50 Lý Tự Trọng, phường Buôn Ma Thuột, tơring čar Dak Lăk), hơdôm rơtuh čô mơnuih ping gah ƀơi Ping gah Gơnong bruă Gru grua, Bơrơguăt drơi jăn hăng Tuai čuă ngui, Anom bruă mă jia tơring čar Dak Lăk nao ngă hră pơplih hră kak tañ biă: “Lăi hrŏm, ngă giong hră pơ-ar rơngiă năng ai 3-5 mơnit, tơguan lĕ 5-7 mơnit đôč mơn, abih tih ñu sui mơ̆ng 10 truh 15 mơnit. Blung a, tơhan kông an pơtô brơi anih phin rup, tơdơi kơ anun lăng glăi anăn păn amăng hră ping gah kah hăng: hrơi blan thun tơkeng, hrơi mut ping gah, anih tơkeng, anih hơdip...Tơdah djŏp tơlơi djơ̆ krĕp mơtăm lĕ pơđut bruă pơplih”.

Ƀơi anih pơplih hră kak Kông an phường Ea Kao, tơring čar Dak Lăk, ăt hơmâo hơdôm pluh čô ping gah nao pơplih glăi. Mơnuih ping gah Trần Quang Thống, 65 thun, Grup ping gah ƀut plơi 11, phường Ea Kao ră ruai, bruă pơplih hră kak pơ anai amuñ biă:  “Kâo mut amăng ping gah thun 1984, truh ră anai hơmâo dua wơ̆t pơplih laih, lêng kơ amăng khul tơhan. Tal anai, pơphun pơplih hră kak tĕp čip tui tơlơi phiăn phrâo mơ̆ng Khul khua gum bruă git gai ping gah dêh čar kiăng wai lăng ƀing mơnuih ping gah klă hloh hăng akŏ pơdong hơdôm grup ping gah kjăp hloh. Ƀing adơi ayong kông an ngă bruă pơplih hră ping gah klă biă, kơnong kơ hơdôm mơnit lĕ giong yơh”.

Tơring čar Dak Lăk tơdơi kơ pơmut hrŏm hơmâo rơbêh 137.000 čô ping gah, jơnum ƀơi rơbêh 5.200 khul grup ping gah. Ngă tui tơlơi pơčrâo trun mrô 51 mơ̆ng Khul khua git gai ping gah hăng akŏ bruă mơ̆ng Ding jum Kông an, Kông an tơring čar git gai Anom bruă tơhan pôlih wai lăng hră pơ-ar hăng hơđong rơnuk rơnua plơi pla hrŏm hăng kông ai ƀơi 102 boh să phường prăp rơmet rơdêh, mơnuih mă bruă či čơkă, pơplih brơi Hră kak ping gah. Tơdơi kơ rơbêh ha wơ̆t hrơi tơjuh pơphun, hơmâo plih brơi rơbêh 70.000 pok hră kak, hơmâo rơbêh 50% mrô pơkă. Him lăng amăng rơwang hrơi tơjuh anai, bruă plih brơi hră kak amra ngă giong abih, rơgao kơ hơnong pơkă. Thiếu tá Lê Đình Đô, Kơ-iăng khua anom bruă tơhan pôlih wai lăng hră pơ-ar hăng hơđong rơnuk rơnua plơi pla, Kông an tơring čar, brơi thâo: “Anom bruă pơphô kơ khua mua Kông an tơring čar prăp rơmet măi mok gơnam yua kơ 102 anom bruă kông an să, phường amăng tơring čar ngă bruă pơplih brơi hră ping gah. Rơngiao kơ anun, gah Ngŏ tơring čar Dak Lăk prăp lui 2 anih pơplih brơi hră kak kơ mơnuih ping gah mă bruă pơ anai; hăng kual Yŭ tơring čar ăt prăp lui 3 anih ngă bruă “3 ca, 4 kip”, mă bruă na nao, wơ̆t hăng hrơi năm hrơi tơjuh mơtăm”./.