Rim hrơi, lơm yang hrơi akă ƀlĕ, samơ̆ glông dăp mơ̆ng khul tơhan polih ia rơsĭ Việt Nam hmâo tơpă brăng laih. Rim ƀô̆ mơtă tơhmit, amăng sa yak kơjăp mơ̆ng ƀing ling tơhan kah hăng lŏm hĭ tơlơi pơ-iă hang mơ̆ng bơyan pơ-iă hang kual Kơdư dêh čar, Pơ-iă kơtang truh 40 đô̆ C ƀudah hơdôm tal hơjan huar sui mông samơ̆ ƀing tơhan polih ăt dô̆ gơgrong mơn, mơguah pơhrăm - čơtlăm pơhrăm, lu hrơi kơtưn wot mơmot.

Thượng úy Nguyễn Hữu Duy Thái lăi pơthâo: Kiăng hmâo grŭp tơhan pơhlôm kơjăp, rim mơnuih amăng khul khom gir run abih pran jua pô. Amăng rim yak tơkai, rim bruă mă leng kơ khom djơ̆ nao hrŏm, hreč. Khă tơnap tap, samơ̆ hlơi hlơi leng kơ pơsit pran jua pơdah djơ̆ tơlơi mơ̆ng ling tơhan ia rơsĭ Việt Nam.

“Dưi buh đĭ sum ao tơhan polih ia rơsĭ drơi pô kâo hrŏm hăng abih bang mơnuih amăng khul ư-ang biă, pơ-ư lơm amra dưi yak rơgao tơdrŏn lăk Ba Đình gru grua. Lơm pơhrăm amăng pơ-iă hang samơ̆ ƀing gơmơi ăt pơsit mơn pran jua prong pioh ngă giong prong bruă jao”.

Dŏng amăng krah glông dăp, Trung úy Trần Đức Nhân ol kơdol pran jua lăi: Anai lĕ tơlơi ư-ang prong hăng drơi pô ñu. Dưi djru hrŏm amăng grŭp pơhrăm rơbat trui mơ̆ng hrơi ngă lơphet yôm phăn, Ñu lăng anun lĕ tơlơi ư-ang, ăt jing bruă gơgrong. Pran jua gum hrŏm hơbit hăng pran pơsit hrưn đĭ djru na nao ƀing apăn bruă tơhan, ling tơhan yak rơgao tơnap, tơlơi gleh glar.

“Khom hơkrŭ glăi pran jua mơ̆ng drơi pô pioh yak rơgao. Drơi pô khom gir run prong hăng khom hmâo pran pơsit prong hloh. Tơlơi ư-ang lĕ drơi pô hmâo djru ƀơƀiă amăng bruă jao prong mơ̆ng lŏn ia”.

Bơ̆ Thượng úy Nguyễn Phúc Đệ, tơdơi kơ uă tañ ia hơjan dô̆ đôm ƀơi ƀô̆ mơta oai jă phang pơ-iă brơi thâo, hơdôm khul tơhan hmâo ngă giong laih rơwang pơhrăm phun, ră anai glăk yak mut pơhrăm kơjăp hloh, pơmut hrŏm pơhrăm hơdôm khul. Glêh glar, tơnap tap, samơ̆ blung hlâo lĕ pran ư-ang lơm buh đĭ sum ao tơhan ia rơsĭ, dưi djru hrŏm ƀơƀiă mut amăng hrơi jơnum ngă lơphet prong mơ̆ng djuai ania.

“Drơi pô kâo tơphă biă hăng mơ-ak lơm dưi djru amăng truh kih mơ̆ng hrơi jơnum prong. Kâo hăng ƀing gŏp amăng khul pơsit pran jua pioh ngă giong prong bruă jao".

Tơdơi kơ mông pơhrăm ruah mă, Trung tướng Lê Quang Đạo – Khua pơtrun bruă tơhan ia rơsĭ hăng Trung tướng Bùi Quốc Oai – Apăn bruă Ping gah Tơhan polih ia rơsĭ – hmâo ƀơi anăp nao pơ̆ anih pơhrăm, nao pơ̆ rim khul pioh tơña bla, pơsur pran jua. Hơdôm tơlơi mă tơngan kơjăp, hơdôm tơlơi pơtă pơtăn bă kơ pran đăo kơnang, hrŏm hăng hơdôm gơnam tam ƀu yôm ôh samơ̆ djru hmâo pran kơtang kơ mơnuih apăn bruă tơhan, ling tơhan. Pơ ala kơ Khua git gai Ƀirô pơtrun bruă tơhan polih ia rơsĭ Việt Nam, Trung tướng Bùi Quốc Oai pơtă pơtăn:

“Bing gih rơnăk tơlơi suaih pral, djă pioh rơnoh pơhrăm bruă, hmâo amăng pô pran ư-ang hăng pơ-ư. Amăng hrơi jơnum prong, rim yak tơkai mơ̆ng ƀing gih amra ƀu kơnong kơ pơdah pran kơtang hăng tơlơi djơ̆ phiăn pơkă ôh mơ̆, ñu dô̆ jing gru rup mơ̆ng tơlơi kơjăp bruă, pơđĭ kyar mơ̆ng khul tơhan polih ia rơsĭ Việt Nam dong”.

Ngă tui pran jua Hơkrŭ blan 8 hăng hrơi pơdŏng Lŏn ia lơ 2/9 djă pioh na nao, hăng phiăn juăt ngă truh kih mơ̆ng Khul ling tơhan mơnuih ƀôn sang Việt Nam, tơlơi gir run gum hrŏm hơbit, gir run ƀu pơdơi mơ̆ng mơnuih apăn bruă tơhan, ling tơhan, Ngă lơphet rơbat trui ƀơi Tơdrŏn lăk Ba Đình lơ 2/9 pơ̆ anăp anai, hơdôm yak tơkai kơtang, leng kơ tơpă brăng mơ̆ng ƀing ling tơhan polih ia rơsĭ sit ñu amra jing gru rup hiam, pioh glăi dơlăm amăng pran jua mơnuih ƀôn sang đơ đam dêh čar hăng gơyut gơyâo jar kơmar./.