Mơ̆ng anun brơi ƀuh Khul đăo phơ̆t Việt nam jai hrơi kơtang jing gong pơčrang apui pơčrâo brơi jơlan mă bruă ƀơi jar kmar mơ̆ng Khul đăo phơ̆t rŏng lŏn tơnah amăng bruă pơpŭ bơni anŏ yôm, tơlơi pơtô djơ̆ mơ̆ng Ơi Phơ̆t yua kơ tơlơi rơngai hăng djru bơwih brơi mơnuih ƀôn sang ƀơi rŏng lŏn tơnah rơnuk anai.

Vesak ƀudah ngă yang Tam hơjp (ngă lơphet hok mơak hrơi tơkeng rai ơi Phơ̆t, mut amăng tơlơi đăo hăng jing mơyang) mơ̆ng Ơi phơ̆t Thích Ca Mâu Ni hơmâo lăng kar hăng bruă jơnum gru grua tơlơi đăo yua kơ tơlơi rơnuk rơnua laih anun hơmâo tŭ yap sit nik ƀơi Khul khua pơ ala Sang gum hơbit djŏp dêh čar tal 54 lơ 15/12/1999.

Mơ̆ng thun 2000 truh ră anai, Jơnum Vesak Sang gum hơbit djŏp dêh čar hơmâo pơphun 19 wơ̆t, amăng anun Việt Nam pơphun truh kih 3 wơ̆t: thun 2008 ƀơi Sang jơnum prong Dêh čar Mỹ Đình, Hà Nội; thun 2014 ƀơi pra yang chùa Bái Đính, tơring čar Ninh Bình; hăng thun 2019 ƀơi pra yang chùa Tam Chúc, tơring čar Hà Nam.

Hăng hơdôm tơlơi dưi ngă truh kih anun, Việt Nam ăt hơmâo ruah ngă anih pơphun Jơnum Vesak sang gum hơbit djŏp dêh čar tal 20 thun 2025 ƀơi Sang hră pơtô Đăo Phơ̆t Việt Nam, tơring glông Bình Chánh, ƀôn prong Hồ Chí Minh.

Jing mơnuih hơmâo lu wơ̆t laih nao jơnum ƀơi Việt Nam, Ơi Phơ̆t Nai prin tha Tampalawela Dhammaratana - Kơ-iăng khua Jơnum min Jar kmar Jơnum vesak Sang gum hơbit djŏp dêh čar (ICDV) lăp hơdor biă mă ƀơi anăp tơlơi gir run mơ̆ng Việt Nam amăng bruă pơƀuh hyu, ngă hmư̆ hing kông ngăn yơyôm mơ̆ng djuai ania hăng Đăo Phơ̆t.

“Vesak Sang gum hơbit djŏp dêh čar 2025 yôm biă mă, ƀu kơnong yua anai lĕ tal 4 Việt Nam pơphun ngă đôč ôh mơ̆ ăt jing 50 thun pơklaih rơngai, lŏn ia pơlir hơbit jing sa dong. Rơngiao kơ tơlơi gum djru mơ̆ng Gong gai Việt Nam ăt hơmâo tơlơi git gai mơ̆ng Khul đăo phơ̆t Việt Nam, phun ñu lĕ Khua khul đăo Phơ̆t Đức Pháp chủ Thích Trí Quảng. Anai jing gru kơnuih hiam, jing gru mơ̆ Khul đăo phơ̆t rŏng lŏn tơnah sem lăng hăng hrăm tui. Kâo lăng anai jing bruă jơnum gru grua hăng lu bruă pơkŏn hlâo, amăng hăng tơdơi kơ mông Jơnum, ngă pơhưč lu mơnuih ƀôn sang nao lăng”.

Nao pơhmư̆ mông jơnum Vesak sang gum hơbit djŏp dêh čar 2025 ƀơi ƀôn prong Hồ Chí Minh thun anai hơmâo 1300 čô khua mơ̆ng jar kmar jing ƀing khua đăo phơ̆t ƀơi rŏng lŏn tơnah; ƀing apăn bruă kơsem min, mơnuih rơgơi kơhnâo...rai mơ̆ng 85 boh dêh čar kual lŏn. Tơlơi anai ƀu kơnong brơi ƀuh tơlơi kơdrưh, tơlơi đăo kơnang mơ̆ng dêh čar pơphun jơnum đôč ôh mơ̆ ăt pơsit tơlơi gơgrong bruă yôm mơ̆ng Khul đăo phơ̆t Việt Nam amăng kual mơnuih tui đăo phơ̆t rŏng lŏn tơnah.

Jơnum Vesak sang gum hơbit djŏp dêh čar tal 20 thun 2025 hơmâo tơlơi akŏ phun lĕ “Gum pơgôp hăng thâo pap mơñai yua kơ tơlơi hiam klă mơ̆ng ană mơnuih: Tơlơi pơmin rơgơi tơlơi thâo hluh dlăm Đăo phơ̆t yua kơ Tơlơi rơnuk rơnua rŏng lŏn tơnah hăng Đĭ kyar hơđong kjăp”. Jơnum anai hơmâo pơphun ngă lu bruă yôm kah hăng ngă lơphet pơphun, jơnum bơkơtuai gưl jar kmar, ngă yang tơkung drơi ơi Phơ̆t, adoh suang čơkă mông jơnum, jơnum pơčrông sai tơlơi hrăm rơgơi hăng hơdôm bruă pơbưp ră ruai gah tơlơi đăo, yang rơbang...

Pơhiăp ƀơi mông ngă yang, pơ ala kơ khua mua Ping gah, Kơnuk kơna Việt Nam, Khua mir sir ơi Lương Cường lăi rơđah, hơdôm tơlơi yôm phun mơ̆ng tơlơi pơtô djơ̆ Tơlơi thâo pap - Tơlơi rơgơi mơ̆ Ơi Phơ̆t pơtô ăt dŏ yôm na nao amăng tơlơi hơdip ană mơnuih ta. Hơdôm tơlơi yôm kah hăng pran khăp kơ lŏn ia, pran jua thâo pap, hơdip hiam mơ̆ng đăo phơ̆t mut tơma amăng pran jua ană mơnuih Việt Nam, djru pơbôr đĭ gru grua hiam mơ̆ng djuai ania Việt Nam. Khua mir sir ơi Lương Cường brơi thâo: “Ping gah, Kơnuk kơna Việt Nam lêng kơ lăng yôm, bơni, hăng ngă găl brơi kiăng hơdôm khul đăo, amăng anun hơmâo đăo Phơ̆t mă bruă tui hăng tơlơi phiăn, ngă tui hơdră thâo pơpŭ, wai lăng tơlơi dưi tui hluai či ruah mă tơlơi đăo, tơlơi ngă yang hiam mơ̆ng abih bang mơnuih, lăng anun jing atur yôm biă mă či akŏ pơdong khul gum pơgôp djuai ania, laih anun amra gum tơngan hrŏm hăng ơi phơ̆t, yă yơng ƀơi rŏng lŏn tơnah gum djru, bơwih brơi tơlơi đăo hăng mơnuih mơnam, yua kơ tơlơi rơngai, hơdip rơnôm, ngă hrŏm hăng đĭ kyar”.

Jơnum prong Vesak sang gum hơbit djŏp dêh čar 2025 ƀơi ƀôn prong Hồ Chí Minh jing sa tơlơi lăp djă pioh biă mă amăng hơdôm bruă djru Việt Nam gum pơgôp lu hloh amăng jơlan ngă bruă ha rơbâo thun mơ̆ng Sang gum hơbit djŏp dêh čar yua kơ tơlơi rơngai, rơnuk rơnua hăng đĭ kyar kjăp phik./.