Amăng mông mă bruă, ƀing pơ ala khua mua 3 boh tơring čar Lâm Đồng, Bình Thuận hăng Dak Nông lăi pơthâo kơ bruă ngă tui tơlơi črâo trun pơmut hrŏm 3 boh tơring čar, hơdră dưm dăp anih anom mă bruă, pơmut gưl să hăng pơjing hơbô̆ bruă pơphun gong gai ƀon lan 2 gưl; lăi pơthâo gum hrŏm ngă tui bruă kơsem min, pơjing hră pơ-ar Jơnum Ping gah tơring čar Lâm Đồng phrâo, hră pơsit Jơnum Ping gah gưl ƀon lan.

Tơdơi kơ hơmâo tơlơi črâo trun pơmut hrŏm 3 boh tơring čar, abih bang mơnuih ƀôn sang ƀơi Lâm Đồng ăt đing nao kơ bruă nao rai, anih dŏ brơi kơ ƀing apăn bruă mơng dua boh tơring čar Dak Nông hăng Bình Thuận amra glăi mă bruă pơ plơi prong Đà Lạt. Ơi Hồ Trung Hiếu, dŏ ƀơi phường 4, plơi prong Đà Lạt brơi thâo:

“Kâo bơngŏt biă mă lơm giăm 2.000 čô mơnuih apăn bruă mơng dua boh tơring čar Dak Nông hăng Bình Thuận amra glăi mă bruă, yua anun bruă dưm dăp, pơsir hĭ hơdôm tơlơi rơkâo kơ ƀing apăn bruă anai hiưm pă ñu. Yua lơm ƀing gơñu glăi mă bruă pơ anai, bruă nao rai amra bưp tơnap tap, laih dong kiăng hơmâo anih dŏ ƀơi Đà Lạt, sui pơ anăp amra hơmâo lu mơnuih kiăng anih dŏ glăi ƀơi anai. Kâo čang rơmang tơring čar Lâm Đồng hơmâo jơlan gah hăng hơdră bruă ječ kiăng pơsir hĭ bruă anai”.

Ƀơi anăp kơ tơlơi đing nao, tơlơi bơngŏt mơng mơnuih ƀôn sang kơ bruă nao rai, anih dŏ brơi ƀing apăn bruă lơm pơmut hrŏm tơring čar, ơi Nguyễn Ngọc Phúc, Kơ-iăng Khua Jơnum min mơnuih ƀôn sang tơring čar Lâm Đồng brơi thâo, tơring čar hơmâo laih hơdră pơsir hĭ bruă anai.

“Ƀing gơmơi hơmâo nao pel ĕp ƀơi giăm 10 anih kiăng ƀing apăn bruă mơng hơdôm tơring čar glăi mă bruă. Anih dŏ, sang dŏ kơnuk kơna pơdong ăt glăk pel ĕp, lăng glăi kiăng pơhlôm brơi adơi ayong hơmâo anih dŏ hơđong. Bơ rơdêh đĭ nao rai, ƀing gơmơi him lăng tơdah rơbêh 50 boh grê, tơring čar Dak Nông kiăng giăm 10 boh rơdêh ha wŏt đuăi, đuăi amăng hrơi tơjuh ƀudah mơguah hrơi sa kiăng pơgiăng adơi ayong nao mă bruă, Bình Thuận ăt kiăng hơdôm hơpluh boh mơn. Ƀing gơmơi ăt rơkâo kơnuk kơna hơmâo hơdră djru brơi prăk kak kơ ƀing apăn bruă anai kiăng hơmâo prăk đuăi nao rai”.

Kơ-iăng Khua dêh čar ơi Nguyễn Hòa Bình lăng yôm tơlơi mut hrŏm mơng 3 boh tơring čar amăng bruă git gai, gum hrŏm ngă tui bruă jao kơ pơmut, dưm dăp anih anom mă bruă, prap lui klă hơdôm boh tơhnal brơi Jơnum Ping gah djop gưl. Laih dong pơtă, djop ƀon lan kiăng tŏ tui pran gum pơgôp ngă tui bruă jao hrŏm, sit biă ñu amăng pơjing hră pơsit jơnum; dưm dăp, ruah mơnuih apăn bruă brơi Jơnum, brơi anih anom; git gai ngă tui tŭ yua hơdôm bruă jao pơđĭ kyar bơwih ƀong huă-mơnuih mơnam. Sit biă ñu, tơring čar Lâm Đồng kiăng ngă klă bruă kơđi čar, črâo ba ƀing apăn bruă, mơnuih Ping gah; dưm dăp mơnuih apăn bruă lăp djơ̆, pơhlôm tui hơnong pơkă, anăp nao ba glăi tơlơi dưi hrŏm.

“Kiăng ngă klă bruă pơ alum pran jua, hơđong tơlơi pơmĭn mơng djop gơnong bruă, sang bruă, djop să, tơring glông tơdơi kơ lui hĭ ngă bruă. Ră anai ngă tui bruă kah pơpha mơng Ping gah, ƀing ta arăng jao bruă hơget ngă bruă anun, samơ̆ anăm brơi ƀuh amăng tơlơi pơmĭn, pran jua kiăng ngă bruă anai, ƀu gưt ngă bruă adih. Kâo rơkâo kiăng hơmâo hơnong pơkă, pơhlôm gêh gal hăng pơhlôm rơđah rơđông, tong ten lơm pơsir hĭ djop bruă brơi lăp djơ̆ hloh. Hăng rĭm čô mơnuih, ƀing ta kiăng gir run ngă tui”.

Kơ bruă dưm dăp, kah pơpha mơnuih mă bruă, Kơ-iăng Khua dêh čar ơi Nguyễn Hòa Bình pơsit tong: Anai lĕ bruă jao ječ, djop ƀôn lan kiăng ngă kiăo tui hơdôm tơlơi pơkă mơng Ping gah hăng Kơnuk kơna kiăng kơ ngă djơ̆, kjăp phik, pơhlôm tong ten. Kiăng lăng hơnong pơkă brơi ƀing apăn bruă prong hloh, pơhlôm hơong pơkă ngă bruă klă, đăo gơnang hăng mut hrŏm kơplah wah djop ƀon lan; đing nao bruă dưm dăp ƀing apăn bruă phun ƀơi gưl să, lăp djơ̆ hăng tơlơi rơkâo bruă jao phrâo.

Bruă pơmut hrŏm 3 boh tơring čar Lâm Đồng, Dak Nông hăng Bình Thuận ƀu djơ̆ kơnong lĕ hơdră bruă pơprong kiăng ngă hơbot anih anom, hrưn đĭ tŭ yua amăng wai lăng đôč ôh mơ̆ ăt lĕ tơlơi yak nao yôm phiăn amăng pơđĭ kyar hơđong kjăp kual Dơnung Dap kơdư hăng ter hang ia rơsĭ Dơnung tong krah. Hơdôm tơlơi đing nao phun mơng mơnuih ƀôn sang hăng ƀing apăn bruă kơ anih dŏ, bruă nao rai, kah hăng bruă pơphun, ruah mơnuih apăn bruă hơmâo khua mua ƀon lan hăng kơnuk kơna đing tơngia hmư̆, git gai kiăo tui tlôn. Hăng tơlơi mut hrŏm, tơlơi gir run prong hloh hăng pran gum pơgôp, tlâo boh tơring čar glăk ƀơƀrư̆ prap lui tong ten kiăng anăp nao pơjing sa hơbô̆ bruă pơphun phrâo, hơđong hăng tŭ yua, lăp djơ̆ hăng tơlơi rơkâo pơđĭ kyar amăng rơwang phrâo. /.