Plơi Hiệp Đồng, să Hòa Xuân, jing kual gah dơnung ia krông Bàn Thạch. Amăng hrơi hơjan kơthel kơtang thun hlâo, hơdôm pluh boh sang ia răm rai, dlưh trun abih, plơi anai dăo mlĕp amăng ia mơtăm, lu sang anŏ rơngiă abih pưk sang đang hmua. Hơdôm thun hlâo adih, rim bơyan hơjan prong, ia dăo mut amăng anih dŏ mơtăm. Yua hnun, lơ̆m să lăi pơthâo či man pơdong sang kơđap hơjan kơthel, bơ amăng plơi ƀu hơmâo dong tah lŏn či pơdong sang, anun jing sang anŏ ơi Nguyễn Văn Liễm, pơpha brơi rơbêh 400 met karê lŏn sang ñu, ƀơi jơlan tơkuh klâo mut nao amăng plơi, či man pơdong sang dŏ: “Kâo hơmâo sa blah lŏn ƀơi jơlan tơkuh klâo bơnah, năng ai 1.760 met karê. Kâo pơpha brơi, kiăng man man pơdong hơdôm pă lĕ gong gai mă yua hơdôm anun, dŏ hơdôm lĕ pioh glăi kơ kâo, ƀu kiăng Kơnuk kơna brơi anŏ hơget ôh. Kâo hai mơak yua mơn. Tơdơi anai, ƀu kơnong sang anŏ kâo ôh, abih bang ană plơi, giong anun ană tơčô mô yâo ta hơmâo anih kơđap hơjan kơthel, ia dăo, hnun mơak biă yơh”.

Ƀơi thôn 1, să Xuân Lãnh, sang anŏ ơi Nguyễn Văn Lang, tơlơi hơdip tơnap tap mơn, samơ̆ ăt kăng pơpha brơi 300 met karê lŏn či pơdong sang kơđap hơjan kơthel. Lŏn ñu brơi ƀu aset ôh pơhmu hăng sang anŏ dŏ lu tơlơi kơƀah, tơnap tap. Samơ̆ tơdơi kơ tal hơjan kơthel ia dăo kơtang thun 2025, ƀuh neh met wa đuăi hyu kơđap pap biă mă, anun jing ñu pơpha brơi lŏn sang pioh či man pơdong sang dŏ hrŏm kơ ană plơi pla: “Thun 2025 ia dăo kơtang, rơngôt kơtang kơtit, hŭi rơhyưt đơi, truh pơ thun 2026 anai, adơi ayong amăng sang anŏ gơmơi lăng pap đơi, anun jing pơmin pơpha brơi lŏn anai bĕ đah mơ̆ng hơmâo anih brơi neh met wa kơđap lơ̆m hơjan kơthel ia dăo”.

Hăng lŏn mơ̆ng sang anŏ ơi Lang brơi, sa boh sang kơđap hơjan kơthel, ia dăo hơmâo pơdong đĭ kjăp. Sang anai hơmâo 2 gưl, pơbung sang glông biă, ngă anih kơđap lơ̆m hơmâo tơlơi truh, wơ̆t hăng ngă anih jơnum plơi pla hlao. Ơi Lê Văn Đông, Khua plơi thôn 1, să Xuân Lãnh, brơi thâo, 97 boh sang anŏ dŏ ter ia krông thôn 1, ră anai hơmâo laih anih kơđap lơ̆m hơjan prong, ia krông blai hang: “Ơi Nguyễn Văn Lang dŏ amăng plơi anai ñu thâo pap biă kơ ană plơi, anun yơh ñu pơpha brơi kiăng neh met wa ngă anih pơdong sang jơnum amăng plơi pla. Neh met wa hok mơak biă, yua hơmâo sang kơđap lơ̆m ia dăo kơtang, ƀu hmao thâo”.

Truh ră anai, năng ai 100 boh sang kơđap kơthel hơmâo man pơdong ƀơi hơdôm boh plơi hơmâo tơlơi truh hơjan kơthel kơtang hloh mơ̆ng tơring čar Dak Lăk, amăng anun hơmâo giăm 2.000 met karê lŏn yua 5 boh sang anŏ kăng pơpha. Hăng hơdôm boh sang anŏ dŏ kơƀah, anun ƀu kơnong bruă gum djru ngăn drăp đôč ôh, ăt jing pran jua thâo khăp pap, hơdor tơngia, thâo gơgrong bruă hrŏm hăng ană plơi pla. Yua dah, lơ̆m hơmâo tơlơi truh, anŏ yom hloh lĕ pran jua thâo kah pơpha, thâo djru tơdruă, găn rơgao djŏp tơlơi truh sat./.