VOV4.Jarai - Tlam lơ 20/5, amăng mông jơnum, Khul pơ ala mơnuih ƀon sang tơring čar Khánh Hòa tal XII hơmâo tŭ yap tơlơi pơtrun djơ̆ hăng tơlơi ƀuăn kah pha mă yua rơnoh prăk tuh pơ alin rơwang thun 2021-2025, mơng ngăn drăp ƀon lan kiăng kơ man pơkra jơlan rơdêh đuăi hmar Khánh Hoà - Buôn Ma Thuột, him lăng giăm 350 klai prăk kiăng kơ ngă tui akŏ bruă, pơhlôm ƀiă biă mă 50% rơnoh prăk duh lŏn mơnai kơtuai tui jơlan glăk man pơkra ƀơi Khánh Hòa. Rơnoh prăk mă yua sit nik amra ngă tui hră pơ-ar kơsem min mrô prăk mă yua hăng hră kơsem min tơlơi tŭ yap mơng gong gai. Ring bruă man pơkra jơlan rơdêh đuăi hmar Khánh Hòa - Buôn Ma Thuột lĕ sa amăng hơdôm ring bruă yôm phăn dêh čar hơmâo Kơnuk kơna rơkâo Ƀrô Khua pơ ala mơnuih ƀon sang dêh čar pơsit hơdră bruă yôm phăn tui hơdră hơjăn hăng gong gai. Jơlan anai glông giăm 117 km hăng 4 glông jơlan hăng him lăng man pơkra amăng thun 2023, giong amăng thun 2025.

Siu Đoan: Pơblang