Hrŏm hăng bruă pok pơhai tơhnal pơkă, ngă tui tơlơi pơplih hơdră bruă, Khánh Hòa glăk pơplih phrâo hơdôm hơdră pơtrut pơđĭ kyar hluai tui pơđĭ kyar anih anom tuh tia pơkra ming hăng apui lơtrik. Tơring čar đing nao pơhưč hơdôm akŏ bruă tuh tia pơkra ming hơdjă, tuh tia pơkra ming yua boh thâo phrâo, pơlir hăng tañ ƀiă ngă hră pơ-ar brơi ngă hăng hrưn đĭ klă bruă djru brơi anom bruă tuh pơ alin. Tong krah blan 12 rơgao, Jơnum min mơnuih ƀôn sang tơring čar Khánh Hòa hơmâo tŭ yap hơdră tuh pơ alin hăng anom bruă tuh pơ alin hăng akŏ bruă man pơdong, sĭ mơdrô anih anom kual tuh tia pơkra ming Ninh Diêm 1, amăng kual bơwih ƀong Vân Phong. Djop mơta mơng bruă pơsur truh ngă hră pơ-ar brơi tuh pơ alin arăng ngă brơi kơnong hơdôm blan đôč. Ơi Trần Minh Chiến, Khua anom bruă wai lăng kual bơwih ƀong huă hăng hơdôm kual tuh tia pơkra mơng tơring čar Khánh Hòa brơi thâo: 

“Ƀing gơmơi hơmâo ngă tui djop tơlơi pơtrun mơng Kơnuk kơna kơ tơhnal pơkă phara. Hluai tui tơlơi anun hơmâo pơplih hơdôm hơnong pơkă kơ lŏn yua pơdong anih tuh tia pơkra ming, pơplih bruă dưm dăp djơ̆ hăng hơdră tuh pơ alin, tŭ yap anom bruă tuh pơ alin. Tui tơlơi găn rơgao hơdôm bruă kiăng ngă hrŏm, glăk ngă bruă anai kiăng prap lui bruă pơ anăp dong, tơdah hơmâo djop tơlơi gal kiăng mơ-it rai hră pơ-ar mơtăm. Ngă tui anun kah mơng tañ hloh”.

Tơlơi sit nik amăng pơplih ngă hră pơ-ar ƀơi Khánh Hòa hơmâo lar hyu amăng hơdôm bruă pơkra pơjing-sĭ mơdrô. Kông ti TNHH Miboo Vina, anom bruă pơkra ƀattô hơmâo 100% prăk tuh pơ alin mơng tač rơngiao, anai lĕ anom bruă pơƀuh tong ten. Sang măi pơkra rai gơnam pioh pơkra ƀattô ƀơi kual tuh tia pơkra ming Ninh Thủy prong rơbêh 12 ektar, abih tih prăk tuh pơ alin 20 klăk đôlar Mi, djop bruă ngă hră pơ-ar tuh pơ alin lêng kơ tañ soh, hăng rơbêh 70% pơhmu hăng tơlơi pơkă. Ơi Nguyễn Văn Trãi, Khua sang măi hok mơ-ak brơi thâo:

“Kâo hluh tơdah kiăng hơmâo sa pok hră pơ-ar pơsit tuh pơ alin tui anun juăt rơngiă mơng 2-3 blan. Gah anom bruă bơdjơ̆ nao hơmâo črâo ba tong ten, rơngiă aka truh ha wŏt hrơi tơjuh dưi ngă giong hră pơ-ar laih. Mơng sa anom bruă pơkra gơnam pioh yua đơ đet, ƀing gơmơi hơdai nao dưi pơkra rai gơnam pơprong ƀiă dong. Yua jai anăp nao klă ƀiă dong amăng bruă pơkra ƀattô”.

Bruă pơtrut pơđĭ kyar amăng hơdôm thun pơ anăp jai prong tui, bruă Khánh Hòa ngă kiăo tui 3 tơlơi pơtrut kơtang mơng gơnong glông jing tơlơi akŏ phun. Hăng tơlơi pơtrut anai, hơdôm akŏ bruă apui lơtrik pơkra phrâo ƀơi Khánh Hòa hơmâo pok pơhai tañ, kơnong giăm 6 blan dưi pơkĕ hrŏm. Ơi Nguyễn Văn Nhựt, Khua gơnong bruă tuh tia pơkra ming hăng sĭ mơdrô tơring čar Khánh Hòa brơi thâo, tơring čar phrâo pok mă yua Sang măi apui lơtrik hrĭp pơ-iă yang hrơi Phước Thái 2; him lăng akŏ thun 2026 tŏ tui pok mă yua dong sang mă apui lơtrik hrĭp pơ-iă yang hrơi Phước Thái 3, tŏ tui pơtrut pơđĭ kyar amăng rơwang pơ anăp dong:

“Ƀu hơmâo jơlan pơkŏn dong tah, kiăng pơđĭ kyar ƀơi anăp hơdôm tơlơi pơtrut phrâo, tơlơi gal phrâo Khánh Hòa aka ƀu hơmâo. Pơhmutu anun lĕ tuh tia pơkra ming hơmâo pơsit lĕ akŏ phun samơ̆ bruă tuh tia pơkra ming ăt kiăng sui thun kiăng hơdôm akŏ bruă phrâo, tơlơi gal phrâo dưi ngă bruă. Yua anun, kơnong apui lơtrik lĕ akŏ phun”.

Hluai tui hơdôm tơlơi pơtrut phrâo mơng tơhnal pơkă, hơbô̆ bruă bơwih ƀong phrâo hăng anih anom apui lơtrik, Khua git gai Ping gah tơring čar Khánh Hòa Nghiêm Xuân Thành pơsit tong bruă pok pơhai ha amăng plĕ hơdôm hơdră bruă, pok phư anŏ gun, mă yua klă hơdôm ngăn rơnoh; tŏ tui pơtrut pơplih ngă hră pơ-ar, hrưn đĭ klă bruă djru brơi mơnuih ƀôn sang, anom bơwih ƀong sĭ mơdrô:

“Ngă tui anun kah mơng dưi pơgiong lu bruă, ngă bruă sit nik. Lơm ba tơbiă 10 bruă akŏ phun, 3 bruă pơtrut phrâo đing nao bruă akŏ phun, bruă amra ngă pơplih rơđah rơđông. Hluai tui hơdôm tơlơi črâo trun mơng gơnong glông anun lĕ yua boh thâo ia rơgơi…Tơlơi črâo trun, hơdră bruă, jơlan hơdră mơng Ping gah tơring čar, djop bruă anai kiăng hơmâo mơnuih ngă. Anom bruă arăng jao bruă hơget kiăng ngă bruă anun, ngă tui anun kah mơng pơgiong tơlơi pơtrun. Hăng bruă anai kiăng gưl glông tŭ yap, kiăo tui lăng./.