Tơhnal pơkă rơnoh pơđĭ kyar bơwih ƀong huă 2 mrô mơ̆ng thun 2026-2030, tơring čar Khánh Hòa hlăk pơtrut kơtang bruă pơhưč tuh pơ alin nao amăng hơdôm ƀut bơwih ƀong huă hăng ƀut sang măi tuh tia pơkra ming kiăng pơjing pran kơtang pơđĭ kyar. Rơnuč blan 5 laih rơgao, Khua mua wai lăng ƀut bơwih ƀong hăng ƀut tuh tia pơkra ming tơring čar hơmâo jao hră pơsit rơkâo tuh pơ alin amăng 13 kơčăo bruă hăng rơnoh prăk abih tih lĕ 7.500 klai prăk.

Amăng anun, kơčăo bruă ƀut sang măi tuh tia pơkra ming Ninh Thọ hơmâo đơ đam lŏn rơhaih 327 ha, rơnoh prăk tuh pơ alin 3.800 klai prăk, dưi čang rơmang pok pơhư prong lŏn man pơdong sang măi hăng pơhưč lu mơnuih ngă bruă mơdrô tuh pơ alin. Pơ ala khua mua sang bruă mơdrô ruah ngă pô tuh pơ alin kơčăo bruă anun, ơi Nguyễn Tuấn Anh, Khua phun kông ty pơčruh ngăn Ƀut sang măi tuh tia pơkra ming Stavian brơi thâo, hră pơar rơkâo tuh pơ alin ră anai ngă tañ, hmar biă mă, gêh găl kơ sang bruă mơdrô.

“Sit mơ̆n ƀuh bruă ngă aka ƀu hơmâo djơ̆ ôh mơ̆ng hlâo laih anun ăt thâo krăn rơđah laih gơmơi dưi ƀuh ƀô̆ mơta ngă hrŏm ră anai hmar kah hăng anun. Amăng plah rơwang 4 blan đôč, pơtong glăi hră pơar hăng jao kơ pô khua sang bruă tuh pơ alin  mơtam, anun lĕ hơdră ngă bruă hmar phara biă mă hăng hlâo adih”.

Hrŏm hăng pơhưč lu kơčăo bruă phrâo, jao pơsir hĭ hơdôm tơlơi gun amăng tơlơi phiăn pioh pơhrơ̆i hrơi mông mă bruă kơ hơdôm kơčăo bruă hlăk dŏ hơmâo ăt kah hăng djru hrŏm ngă kơjăp tui tơlơi đăo kơnang mơ̆ng khul mơnuih ngă bruă mơdrô. Lu anom bruă mơdrô pơprong amăng anih tuh tia pơkra ming bơwih ƀong Vân Phong hơmâo ƀư̆ pơkra glăi rơnoh pơkă tuh pơ alin hăng mă bruă amăng plah rơwang mơ̆ng 50 truh 70 thun boh sui.

Hăng hơdôm kơčăo bruă čuk pơkra jơlan amăng kual ngă anih pơdong sang măi, hrơi blan ngă giong hră pơar jao tơlơi dưi tuh pơ alin či mă bruă yom biă mă. Ngă hră jai hmar, lŏn mơnai anih tuh pơ alin tañ mơ̆n tŭ mă, či ba yua, ngă gêh găl pơhưč lu sang bruă mơdrô pơkŏn kiăo tui mut mă bruă hăng pok anih pơkra ming, pơjing rai gơnam sĭ mơdrô. Tui hăng khua mua wai lăng anih bơwih ƀong hăng anih tuh tia pơkra ming tơring čar Khánh Hòa, boh tơhnal anai dưi hơmâo lĕ yua mơ̆ng bruă pơblih phrâo hơdră git gai, wai lăng, kơtưn ngă hrŏm plah wah djop sang bruă, anom bruă hăng djru kơ sang bruă mơdrô ngă tui mơ̆ng blung a lơ̆m prăp lui hră pơar. Ơi Trần Minh Chiến, Khua khul wai lăng anih bơwih ƀong huă hăng anih tuh tia pơkra ming tơring čar Khánh Hòa brơi thâo:

“Tal jao hră lơ 25/5 phrâo anai, dơ̆ng mơ̆ng hrơi rơkâo mơ-it nao hră pơar truh kơ hrơi blan tŭ ư jao hră pơsit amăng 4 blan đôč. Abih bang črăn ngă hră  lĕ hơmâo pơhrŏ hĭ ƀiă mơ̆ng 30-50% črăn ngă hră pơar”.

Ơi Lê Huyền, Kơ-iăng khua Jơnum min mơnuih ƀôn sang tơring čar Khánh Hòa brơi thâo, tơring čar đing nao pơđĭ kyar bruă čuk pơkra jơlan nao rai, mut pơtruh ƀơi djop ƀut sang măi tuh tia pơkra ming, anih bơwih ƀong huă, laih dơ̆ng ruah mă sang bruă tuh pơ alin hơmâo prăk kăk hơđong, tơlơi thâo găn rơgao amăng bruă mă hăng ba yua boh thâo ia rơgơi pioh pok pơhai hơdôm kơčăo bruă či ngă anun.

“Gah Jơnum min mơnuih ƀôn sang tơring čar lĕ gơmơi khut khăt laih, samơ̆ ăt gir run khut khăt hloh amăng ngă hrŏm ƀing sĭ mơdrô bơwih ƀong huă. Rơngiao kơ bruă iâu pơthưr sang bruă mơdrô tuh pơ alin lĕ gơmơi ăt lăng nao tơlơi djơ̆ găl, biă mă ñu pơdjơ̆ nao jơlan glông pơtruh nao rai amăng ƀut tuh tia pơkra ming pioh pơhlom brơi kơ ƀing ngă bruă mơdrô tuh pơ alin sa lĕ pơgang anŏ tŭ yua, ngă bruă gêh găl hloh, dua lĕ  ngă bruă sit nik, amăng anun boh tŭ yua kơ ƀing ngă bruă tuh pơ alin, pơgang anŏ tŭ yua kơ ƀing tuh pơ alin tŏ tui hăng wơ̆t anŏ tŭ yua kơ tơring čar dơ̆ng”.

Mơ̆ng bruă ngă hmar, tañ hloh hră pơar tuh pơ alin, truh kơ bruă pơsir hĭ anŏ gun, ruh abih anŏ rung kơđông amăng jơlan glông hăng pơklaih ala lŏn, Khánh Hòa hlăk yak nao ngă gêh găl brơi kơ djop kơčăo bruă tañ pok pơhai ngă tui mơtam. Anai lĕ, atur pioh kơ tơring čar anai ăt pơhưč lu hloh hnoh prăk rô nao phrâo, anăp nao tơhnal pơkă pơđĭ kyar dua mrô hơdôm thun pơ anăp adih.