Ƀơi sang hră gưl I Nha Trang, 13 boh sang hră hơmâo dưm dăp jing sa boh sang hră, hơmâo 1 boh sang hră phun, 12 anih pơdong phara hăng 5 boh sang hră pơčlah, hăng rơbêh 10.500 čô čơđai kiăo tui hrăm. Sang hră hơmâo pơdong mơng hơdôm ƀon lan ƀơi rŏng lŏn tru pơ hơdôm boh sang hră amăng hơdôm bul pơtâo amăng kual tong wing Nha Trang.

Hăng bruă pok prong anai, sang hră hơmâo pel ĕp glăi ƀing nai pơtô amăng djop sang hră, pơplih nai pơtô mơng anih hơmâo djop pơpha brơi anih dŏ kơƀah, sit biă ñu lĕ hơdôm tơlơi hrăm phara. Yă Châu Đình Mai Phương, Khua sang hră gưl I Nha Trang brơi thâo, bruă dưm dăp, pơplih lăp djơ̆ blung a pơgôp ngă klă tui bruă pơtô hrăm ƀơi sang hră: “Kar hăng tơlơi hrăm Angle, hlâo adih ƀơi hơdôm boh sang hră pơdong phara, đa hơmâo anih čơđai khŏm duh prăk kah dưi hrăm. Samơ̆ tơdơi kơ pơmut hrŏm, ƀing nai rơbêh ƀơi sang hră anai amra nao pơtô pơ anih glăk kơƀah nai, kiăng ƀing čơđai dưi hrăm, huăi kiăng duh prăk ôh. Hăng tơlơi hrăm Tin học ăt tui anun mơn. Tơdơi kơ pơmut hrŏm, ƀing nai pơtô Tin học hơmâo pơpha anih pơtô, mông pơtô ƀơi hơdôm sang hră phara.”

Bruă wai lăng sang hră pok prong tui anun, hăng lu sang hră rơkâo gơnong bruă pơtô tơring čar Khánh Hòa pơplih jơlan gah wai lăng. Khua sang hră đing nao hơdôm bruă hrŏm amăng pơtô hrăm, ƀing neh nai hăng ngă klă amăng pơtô hrăm; hơdôm bruă amăng hơdôm anih pơtô hrăm phara, hơdôm boh sang hră hơmâo jao brơi ƀing wai lăng ƀơi anih. Sang hră hrŏ ƀiă hơdôm mông jơnum ƀơi anăp tơdah ƀu kiăng đơi ôh, lu tui mông pơlăi nao rai ƀơi anăp hăng mă yua tơlơi pơhing răk pioh hrŏm.

Ƀơi gưl să, phương, gong gai ƀon lan gum hrŏm pơhlôm brơi djop tơlơi gal djru pơtô hrăm, sit biă ñu lĕ gơnam măi mok, sang hră hăng pơsir hĭ hơdôm bruă phrâo ƀuh ƀơi sang hră. Ơi Vũ Ngọc Đương, Khua gơnong bruă pơtô pơjuăt tơring čar Khánh Hòa brơi thâo, gơnong bruă tŏ tui lăng glăi ƀing nai pơtô, pơpha nai pơtô ƀơi hơdôm anih lu nai, nao pơtô anih dŏ kơƀah, laih dong pơgiong bruă kah pơpha, jao gưl: “Bruă wai lăng hluai tui yua boh thâo măi mok phrâo, hluai tui mrô jŭ yap, tơhnal pơkă, tơlơi pơkă amăng kah pơpha, kah gưl. Lơm pơmut hrŏm, tơlơi tŭ mă mơng hơdôm boh sang hră pơdong phara lĕ ăt kar kăi amăng să. Anai lĕ bruă ngă klă biă. Ƀing amĭ ama čơđai ăt bơtŭ ư biă mă. Plih hĭ hlâo adih kiăng ruah sang hră, ruah hơdôm sang hră klă, ră anai amăng să, bruă pơtô hrăm hăng hơdôm boh sang hră lêng pơplông klă soh”./.