Ƀơi Kual bơwih ƀong huă Vân Phong, hơdôm kơčăo bruă phrâo gah măi mok boh thâo kleng kleh, tơmla, glăk pok tui lu anih či pơkra gơnam. Rơngiao kơ Sang măi Pơkra ƀat tô HD Hyundai Việt Nam, pơ anai glăk pơphun pơdong Sang măi pơkra tơmla, kleng kleh ƀat tô mơ̆ng Miboo Vina, prăk tuh pơ alin 528 klai, čang rơmang pơhrua tui tơlơi dưi ngă bruă kơ anom bruă pơkra ƀat tô.

Ơi Nguyễn Văn Trãi, Khua git gai Miboo Vina, brơi thâo:“Lu biă ñu lĕ bruă dưm truă, pơtar tơmla, čơkăp, trơ̆i pơsơi pơsă, jing phun ñu lĕ ƀing kĭ sư Việt Nam mơn, ƀing apăn akŏ pơkra gơnam lu biă ñu lĕ mơnuih Việt Nam mơn. Ră anai ƀing ta ngă bruă anun rơgơi biă. Sa gơnam dưm truă giong hơmâo ngă gah rơngiao, ƀu djơ̆ tui mơ̆ng hlâo lĕ ƀing ta ngă hlao amăng sang măi Hyundai. Ră anai gơñu ƀu anăm ngă ôh, gơmơi ba măi mok gơnam hơmâo dưm truă hơđăp, giong anun gơñu pơtruă, pơtar glăi đôč, jing tañ hloh, mrô ƀat tô hơmâo pơkra amăng ha thun jing lu tui mơn”.

Hrŏm hăng man pơdong, măi mok boh thâo, čơkă tuai hyu ngui jing tơlơi pơtrut prong biă amăng bruă đĭ kyar. 9 blan, Khánh Hòa čơkă rơbêh 20,4 klăk wơ̆t tuai, tuai mơ̆ng jar kmar rơbêh kơ 7,1 klăk wơ̆t; prăk pơhrui giăm 68.000 klai, đĭ 21%. Festival ia rơsĭ Khánh Hòa 2026, Hrơi gru grua djuai ania Chăm tal 6 hăng Miss World 2026 jing bruă hmư̆ hing biă mă, pơƀuh hyu rup, gru grua hiam hăng gơnam bơwih brơi tuai mơ̆ng tơring čar. Čơkă tuai hyu ngui đĭ kyar rơnoh 2 mrô ba truh anŏ đĭ kyar bruă bơwih bơwang, pơdŭ pơgiăng, sĭ mơdrô mơ̆ng hơdôm boh tơring. Yă Thái Thị Lệ Hằng, Khua gơnong bruă gru grua, bơkjăp drơi jăn hăng tuai čuă ngui tơring čar Khánh Hòa, brơi thâo, bruă čơkă tuai hyu ngui ăt jing bruă ba jơlan bơwih ƀong mơ̆ng Khánh Hòa mơn amăng hơdôm blan pơ anăp:“Čang rơmang pơ anăp hơmâo čơkă lu tuai mơ̆ng čar Khač, hơmâo ƀing tuai mơ̆ng dêh čar pơkŏn dong; tuai amăng čar ta hai ăt hơmâo lăng yom mơn. Gơnong bruă amra ĕp anom bruă ngă hrŏm pơphun lu bruă ngui ngor, hnun kah mơ̆ng pơhưč tuai hyu ngui, amăng anun ăt lăng yom gru grua plơi pla yơh tơlơi pơtrut akŏ phun mơ̆ng bruă bơwih ƀong čơkă tuai, pơkra pơjing lu dong gơnam hmư̆ hing bơwih brơi tuai hyu ngui”.

Kơ hơdôm anŏ tơnap, pơgăn bruă đĭ kyar, rơnoh đĭ kyar 8,7% mơ̆ng bruă măi mok pơkra gơnam jing aset hloh kơ rơnoh ba tơbiă. Prăk ngă bruă logistics, pơplih mơ̆ng anih sĭ mơdrô jar kmar hăng kah pơpha apui lơtrik ăt ngă tơnap mơn kơ bruă pơkra gơnam măi mok mơ̆ng tơring anai. Kiăng dưi bong glăi hăng tơlơi pơplih phrâo, hơdôm sang bruă bơwih ƀong rơkâo hơmâo hơdră djru brơi hlâo bruă pơkra gơnam, pơkra măi mok, hơmâo nua yom, đĭ kyar bruă pơkra gơnam kleng kleh, hrĕ apui añĕ laih anun pơklaih brơi anŏ tơnap kơ hơdôm bruă kaih đĭ kyar.

Yă Trịnh Thị Hồng Vân, Khua khul ding kơna Kông ti Yến sào Khánh Hòa brơi thâo, mah čang rơmang hơmâo hơdră djru, sang bruă bơwih ƀong ăt lăng tơlơi gir mơ̆ng pô yơh phun ñu:“Amăng hrơi mông tơring čar glăk tơnap tui hăng anai, kơ mrô pơkă măi mok boh thâo pơkra gơnam, kông ti ăt gir kiăng hơmâo rơnoh đĭ kyar năng ai 30-35%, laih anun gir hloh đah mơ̆ng dưi ngă”.

Tui hăng ơi Nguyễn Việt Hùng, Khua jơnum min mơnuih ƀôn sang tơring čar Khánh Hòa, anih dưi đĭ kyar mơ̆ng tơring ăt hơmâo lu mơn. Truh ră anai, tơring čar kraih brơi nao prăk tuh pơ alin 70% đôč, pơsir brơi 106/257 kơčăo bruă dŏ gun. Tơdah brơi nao 100% mrô prăk laih anun dưi pơsir brơi kơčăo bruă dong, Khánh Hòa amra bong kjăp rơnoh đĭ kyar rơbêh 11% mơ̆ng 9 blan. Ơi Nguyễn Việt Hùng lăi, bruă či đĭ kyar lu mơn, samơ̆ rơnoh đŭ kyar glăk kơnang kơ tơlơi rơgơi mơ̆ng gong gai kơđi čar mơn:“Hơmâo lu biă kơčăo bruă akŏ phun mơ̆ Gơnong dlông lăp đing nao, yom lĕ ƀing ta dưi ngă mơn hă ƀô̆? Tơlơi gơgrong mơ̆ng ƀing ta lĕ mă pơhrui, pơklaih ala lŏn, anai jing atur đah mơ̆ng dưi ngă bruă jao. Kơčăo bruă tuh pơ alin lĕ ƀing ta đĭ kyar, bơ đĭ kyar kơnang kơ tơlơi rơgơi ngă bruă. Tơnap lĕ adơi ayong ƀing ta gum ĕp jơlan pơsir, pơklaih brơi”.

Amăng 9 blan ngă bruă, pơjing rai phun atur kiăng Khánh Hòa dưi hơmâo rơnoh đĭ kyar 2 mrô thun 2026. Tơlơi jŭ yap ƀơi anăp lĕ pơjing bruă tuh pơ alin, pơkra gơnam, čơkă tuai hyu ngui hăng tơlơi gêh găl Vân Phong jing tơlơi dưi či đĭ kyar sit nik, hơđong kjăp./.