VOV4.Jarai - Čơtlăm lơ 22/4, ơi Marc Knapper, Khua phrâo anih jưh pơ ala kơ dêh čar Mi ƀơi Việt Nam nao lăi pơthâo hăng mă bruă hăng Khua ƀôn prong Đà Nẵng. Khua anih jưh pơ ala kơ Mi pơsit anih anom tuh pơplai mơng Đà Nẵng. Ơi Marc Knapper brơi thâo hmâo pơdŏng laih ƀơi Đà Nẵng anom mă bruă Khul bơwih ƀong Mi ƀơi Việt Nam. Hluai tui Anom anai, pơ̆ anăp anai, amra hmâo lu mơnuih tuh pơplai mơng Mi nao pơ̆ Đà Nẵng ĕp tơhnal bơwih ƀong, yua kơ Đà Nẵng lĕ anih anom tuai čuă ngui hmư̆ hing dưi hmâo dêh čar tač rơngiao hor.

Khua anih jưh pơ ala kơ Mi ơi Marc Knapper nao lăi pơthâo hăng Khua ƀôn prong Đà Nẵng

Ƀôn prong Đà Nẵng hmâo khul mơnuih mă bruă dưi pơtô bruă kơjăp, hmâo tơdrun tum păn ia dơlăm, tơdron rơdêh por jar kơmar hăng hơdôm anih anom mă yua ngă pơhư̆č ƀing tuh pơplai. Ơi Marc Knapper ƀuan hlâo amra pơtrut ƀing tuh pơplai dêh čar Mi nao tuh pơplai, ƀu djơ̆ pơjing tơhnal gal kơ anom bơwih ƀong huă ôh mơ̆, ñu dô̆ djru pơgôp kơ tơlơi pơđĭ kyar pơdrong asah hrom mơng mơnuih ƀôn sang Đà Nẵng dong. Ơi Nguyễn Văn Quảng, Khua git gai Ping gah ƀôn prong Đà Nẵng rơkâo hăng bruă mă mơng pô, Khua anih jưh pơ ala kơ Mi amra pơtrut klă hloh hơdôm tơlơi rô nao rai kơplah wah Khul hơdôm bôh anom bơwih ƀong Mi ƀơi Việt Nam hăng ƀôn prong Đà Nẵng./.

Siu H’ Prăk: Pơblang