VOV4.Jarai - Khua anih jưh pơ ala kơ Việt Nam ƀơi dêh čar Mi, ơi Nguyễn Quốc Dũng hmâo laih bruă bơkơtuai hăng yă Sarah Bianchi, Kơ-iăng Khua pơ ala kơ bruă sĭ mơdrô dêh čar Mi. Dua bơnah hmâo tŭ ư kơ tơhnal yôm phăn mơng bruă pơtrut hơdôm rơwang bruă gum hrom bơwih ƀong – sĭ mdrô kơplah Mi hăng kual hrom hăng Việt Nam. Amăng mông bưp, Khua anih jưh ơi Nguyễn Quốc Dũng hăng yă Sarah Bianchi pơsit yôm tơlơi pơđĭ kyar bruă bơwih ƀong – sĭ mơdrô kơplah wah dua bôh dêh čar amăng hơdôm hrơi rơgao. Dua bơnah bơkơtuai kơ sa dua bruă gum hrom hăng đing nao hrom amăng bruă sĭ mơdrô nao rai mơng Việt Nam hăng Mi hăng tŭ ư hrom kơ tơhnal yôm phăn mơng bruă pơtrut hơdôm rơwang gum hrom bơwih ƀong – sĭ mơdrô kơplah wah Mi hăng kual hrom hăng Việt Nam. Ơi Nguyễn Quốc Dũng čang rơmang dua bơnah djă pioh gum hrom, bơkơtuai tâ̆o klă amăng hơdôm tơlơi akă djơ̆ hrom. Kơ-iăng Khua pơ ala kơ bruă sĭ mơdrô Mi bơni kơ ơi Nguyễn Quốc Dũng hmâo nao pơ̆ plơi prong jưh jom Washington, čang rơmang amra mă bruă kơjăp hăng Khua anih jưh hăng Ƀirô anih jư̆h pơ ala kơ Việt Nam kiăng pơtrut gum hrom bơwih ƀong hăng sĭ mơdrô kơplah wah dua bơnah./.

Siu H’ Prăk: Pơblang