Amăng giăm 40 tơlơi pơgôp hiăp mơng mơnuih ƀôn sang amăng mông bưp, lu hloh lăi nao bruă bơrơsua lŏn mơnai kơplah wah mơnuih ƀôn sang hăng hơdôm boh kông ti, anom bơwih ƀong sĭ mơdrô hơmâo Kơnuk kơna jao lŏn mơnai. Tui mơnuih ƀôn sang, bruă mă yua ƀu djơ̆, ngă bơrơsua lŏn mơnai sui hơdôm hơpluh thun samơ̆ ăt aka ƀu hơmâo tơlơi đing nao pơsir hĭ khut khăt.

Ƀuh hơdôm bruă bơdjơ̆ nao amăng wai lăng, mă yua hăng bơrơsua lŏn mơnai ƀơi să Ninh Gia ngă tơnap tap hăng sui thun, ơi Phan Đình Trạc, Ding kơna Khul apăn bruă Ping gah, Khua anom pơphô bruă Ping gah rơkâo Khua mua tơring čar Lâm Đồng ječ ameč pel ĕp, pơsir hĭ djơ̆ bru, djơ̆ mơnuih. Hăng hơdôm boh tơhnal djơ̆ tơlơi glăm ba, ƀing khua pơ ala mơnuih ƀôn sang tơring čar Lâm Đồng amra hơmâo hră pơ-ar rơkâo Ding jum ling tơhan pơsir hĭ.