VOV4.Jarai-Mơguah lơ 21/1, ƀơi tơring čar Tây Ninh, ơi Nguyễn Trọng Nghĩa, Khua anom pơtô bruă Ping gah dêh čar hrom hăng grup hyu mă bruă nao čuă pơsat gong kut h’ŭ tơhan djai pơsăn drơi jăn kơ lŏn ia; čuă tơhan Sư đoàn 5 laih anun ƀơk gơnam tết kơ sang anŏ hơmâo anăn kơnuk kơna djru, sang anŏ ƀun rin, mơnuih tơnap tap ƀơi să Thái Bình, tơring glông Châu Thành.

Ƀơi să Thái Bình, tơring glông Châu Thành, ơi Nguyễn Trọng Nghĩa jao 40 anung gơnam kơ sang anŏ kơnuk kơna djru ba, sang anŏ mơnuih ƀôn sang ƀun rin, mơnuih tơnap tap yua klin Covid 19. Bưp ră ruai hăng mơnuih ƀôn sang laih anun khua mua ƀơi să anai, ơi Nguyễn Trọng Nghĩa brơi thâo, bruă đing nao tơlơi hơdip mơda, djru brơi tơlơi mơak pran jua, bơwih ƀong huă kơ mơnuih ƀun rin, sang anŏ tơnap tap jing sa bruă mă mơ̆ng Ping gah hăng Kơnuk kơna gleng nao biă mă, boh nik ñu amăng bơyan ƀong tết ngă yang thun phrâo djuai ania. Tlam lơ 21/1, ơi Nguyễn Trọng Nghĩa ăt hyu čuă hăng ƀơk gơnam kơ mơnuih mă bruă apah ƀơi anih pơkra ming sa ƀut či tơring glông Gò Dầu, tơring čar Tây Ninh.

Nay Jek: Pơblang