VOV4.Jarai - Anăp nao hrơi pioh hơdor kơ nai ia jrao Việt Nam 27/2, mơguah lơ 21/2, ơi Nguyễn Trọng Nghĩa, Khua apăn bruă Ping gah, Khua anom pơtô bruă Ping gah dêh čar hơmâo nao pơpŭ ƀing ơi ia jrao, nai ia jrao ƀơi Sang ia jrao Ling tơhan mrô 108, Sang ia jrao pơjrao kơsŏ gơnong glông hăng nao čuă Nai tha prin, nai prin tha Vũ Văn Đính mơnuih akŏ pơjing gơnong bruă Hồi sức cấp cứu Việt Nam. Tŭ yap hơdôm tơlơi gir run mơng ƀing nai ia jrao ƀơi Sang ia jrao Ling tơhan mrô 108, Sang ia jrao pơjrao ruă kơsŏ gơnong glông ăt kah hăng gơnong bruă ia jrao amăng đơ đam dêh čar hơmâo ngă hăng glăk ngă lĕ ƀing mơnuih ba jơlan hlâo amăng bruă pơgang klin, ơi Nguyễn Trọng Nghĩa lăi pơtong, anai lĕ tơlơi gum pơgôp prong prin djru brơi mơnuih ƀon sang. Lu nai ia jrao, ơi ia jrao hơmâo tuh rơyuh pran jua amăng bruă pơgang klin Covid-19. Mơ-it tơlơi pơpŭ kơ abih bang ơi ia jrao, nai ia jrao ƀrô tal pioh hơdor nai ia jrao Việt Nam, ơi Nguyễn Trọng Nghĩa rơkâo gơnong bruă ia jrao tŏ tui ngă klă tui tơlơi pơtrun mơng gơnong glông mrô 6 tal 12 kiăng tŏ tui pơplih phrâo amăng bruă mă, wai lăng, hrưn đĭ klă dong hăng tŭ yua amăng bruă mă mơng djop anom bruă.

Siu Đoan: Pơblang