Tlam lơ 19/6, Khua apăn bruă ping gah, Khua anom pơtô bruă Ping gah dêh čar ơi Nguyễn Trọng Nghĩa ba jơlan khua mua Anom pơtô bruă Ping gah nao čuă hăng bơni kơ abih bang khua mua, mơnuih hyu mă tơlơi pơhing, mơnuih dăp hră pơhing, mơnuih pôr pơhing, mơnuih mă bruă amăng Gong phun pơtui jua pơhiăp dêh čar Việt Nam (VOV) ƀrô hrơi ngă lơphet 98 thun hrơi Hră pơhing hơkr Việt Nam (21/6).

Lăng VOV jing sa amăng hơdôm anom bruă pôr pơhing phun hơmâo lu tơlơi pơplih či pơđĭ tui bruă pôr pơthâo, kiăng jua pơhiăp mơ̆ng VOV pôr hyu ataih hloh amăng kual lŏn, bul pơtâo ia rơsĭ, hăng mơnuih ƀôn sang pơ guai dêh čar, kual ataih yaih, biă ñu hăng mơnuih ƀôn sang Việt Nam pơ dêh čar tač rơngiao, ơi Nguyễn Trọng Nghĩa pơtă hlâo: Tơlơi hơget ƀing ta hơmâo ngă laih ƀing ta khŏm djă bong hăng ngă klă hloh. Jua pơhiăp VOV pôr pơ bul pơtâo Trường Sa hăng kual Dap Kơdư klă biă. Yua dah ƀu kơnong hmư̆ kiăng mơ-ak, ƀudah hmư̆ tơlơi pơhing đôč ôh mơ̆ ăt jing bruă pơgang ba Lŏn ia, pơsit tơlơi dưi wai lăng lŏn ia mơ̆ng ƀing ta, djru ba mơnuih bưp tơlơi truh hăng pơsir lu tơlơi truh pơkŏn dong...Ăt kiăng abih bang mơnuih mă bruă djă bong kơjăp tơlơi pơmin pran jua tui anun.