VOV4.Jarai - Tlam lơ 14/4, Khua anom pơtô bruă Ping gah dêh čar hơmâo mông mă bruă hăng Khul apăn bruă Ping gah tơring čar Quảng Ngãi. Tui hră lăi pơthâo, rơwang tal I thun anai, abih tih rơnoh pơhrui ngăn drăp kơnuk kơna amăng tơring čar Quảng Ngãi rơbêh 8.600 klai prăk, đĭ 56,5% pơhmu tui tơđar. Bruă tuh tia pơkra pơjing tŏ đĭ tui, rơnoh pơkra pơjing amăng rơwang tal I đĭ 6,8% pơhmu tui tơđar. Rơnoh pơhrui mơng sĭ mơdrô pơ tač rơngiao dưm dưm 533 klăk đôlar Mi, đĭ 27,2% pơhmu tui tơđar.

Mông mă bruă

Thượng tướng Nguyễn Trọng Nghĩa, Khua apăn bruă Ping gah dêh čar, Khua anom pơtô bruă Ping gah lăng yôm hơdôm boh than dưi ngă mơng Ping gah, gong gai hăng mơnuih ƀon sang tơring čar Quảng Ngãi amăng thun blan laih rơgao; laih dong rơkâo tơring čar Quảng Ngãi gir run dong kiăng kơ hơmâo lu tơlơi dưi tui hơnong pơkă mơng Jơnum Ping gah tơring čar tal XX ba tơbiă. Ƀrô tal anai, Khua anom pơtô bruă Ping gah hrŏm hăng Grup hyu mă bruă hơmâo nao tŭi ñang, dưm guang bơnga ƀơi anih pioh pơpŭ tơhan sông kơtang dêh čar Trương Định, anih djă pioh gru grua Sơn Mỹ; pơsat mơnuih pơsăn drơi yua khăp kơ lŏn ia Huỳnh Thúc Kháng.

Siu Đoan: Pơblang