Amăng mông bưp, ơi Nguyễn Trọng Nghĩa hăng Khua anih jưh pơ ala dêh čar Mi ƀơi Việt Nam tŭ ư thun 2025 lĕ thun yôm phăn biă mă, pioh hơdor glăi 50 thun dêh čar Việt Nam rơngai, 30 thun dêh čar Việt Nam-Mi ngă bơmơ-ak tơlơi rô nao rai, anai lĕ hrơi mông kiăng dua bơnah lăng glăi hơdôm tơlơi yak nao sui thun, mơng gru grua hing ang đưm hlâo truh ră anai hăng anăp nao pơgi kơdih.

Dua bơnah pơsit tong tơlơi rô nao rai hiam klă kơplah wah dua boh dêh čar lĕ mơng tơlơi čang rơmang sit nik kơ mơnuih ƀôn sang dua bơnah, anai lĕ ngă tui tơlơi yak nao, hơnong pơkă hăng tơlơi gir run mơng khua mua dua bơnah, mơng đưm hlâo kah hăng ră anai. Tơlơi rô nao rai kơplah wah Việt Nam-Mi amra jing tơlơi pơtrut pơdrong asah hăng rơnuk rơnua amăng sa boh kual yôm hloh amăng rŏng lŏn tơnah, yua kơ tơlơi rơnuk rơnua, hơđong, ngă hrŏm hăng pơđĭ kyar hơđong kjăp.