VOV4.Jarai-Lơ 20/1, Grup hyu mă bruă mơ̆ng Gơnong dlông yua kơ yă Bùi Thị Minh Hoài, ding kơna khul git gai ping gah dêh čar, Khua anom pơtô mơnuih ƀôn sang mơ̆ng Ping gah dêh čar ba jơlan hlâo, nao čuă, pơpŭ thun phrâo tết laih anun ƀơk gơnam kơ sang anŏ hơmâo anăn kơnuk kơna djru, sang anŏ ƀun rin, mơnuih mă bruă apah tơnap tap bơyan ƀong tết Nhâm Dần 2022 amăng tơring čar Dak Nông.

Khua anom pơtô mơnuih ƀôn sang ping gah dêh čar yă Bùi Thị Minh Hoài ƀơk gơnam kơ mơnuih ƀun rin, mơnuih hyu mă bruă apah tơnap tap

Grup hơmâo ƀơk 350 anung gơnam djru mơ̆ng Jơnum min djop djuai ania mơnuih mơnam Việt Nam brơi kơ sang anŏ kơnuk kơna djru, sang anŏ ƀun rin, mơnuih hyu mă bruă apah ƀu hơmâo mơnong ƀong huă tơnap bơyan ƀong tết; 200 anung gơnam mơ̆ng Anom bruă mơnuih tơpuôl Việt Nam djru kơ 200 boh sang anŏ kơnuk kơna lăng ba, sang anŏ tơnap tap, ƀun rin; sang anŏ bơbeč djơ̆ klin Covid 19.

Khua Khul wai lăng djop djuai ania mơ̆ng sang bruă pơ ala mơnuih ƀôn sang dêh čar Y Thanh Hà Niê Kdăm jao 500 klăk prăk mơ̆ng prăk djru yua sang bruă prăk BIDV brơi kơ mơnuih tơnap tap tơring čar Dak Nông

Ăt amăng tal nao čuă anai mơ̆n, Y Thanh Hà Niê Kdăm, Khua Khul wai lăng djop djuai ania ƀiă mơ̆ng sang bruă khua pơ ala mơnuih ƀôn sang dêh čar nao ƀơk 150 anung gơnam kơ sang anŏ ƀun rin, sang anŏ kơnuk kơna djru, sang anŏ mơnuih arăng đăo kơnang jing mơnuih djuai ƀiă ƀun rin hăng 500 klăk prăk mơ̆ng prăk djru yua kơ sang bruă prăk sĭ mơdrô tuh pơ alin hăng pơđĭ kyar Việt Nam djru, brơi kơ  hơdôm sang anŏ kơnuk kơna lăng ba, sang anŏ ƀun rin, mơnuih hyu mă bruă dŏ tơnap tap amăng tơring čar.

Nay Jek: pơblang