VOV4.Jarai - Kiăng prăp lui mông jơnum lok 3, Ƀirô khua git gai pơ ala mơnuih ƀon sang dêh čar tal 15, tlam lơ 28/4, ơi Phan Đình Trạc - Ding kơna Ding jum kơđi čar, Khua apăn bruă Ping gah dêh čar, Khua Anom git gai wai lăng bruă Ping gah dêh čar ta hrŏm hăng ƀing khua pơ ala mơng tơring čar Lâm Đồng hơmâo laih mông bưp mơnuih ƀon sang ƀơi să Xuân Thọ, plơi prong Đà Lạt.

Ơi Nguyễn Đình Trạc - Ding kơna ding jum kơđi čar, Khua anom git gai wai lăng bruă mơng Ping gah pơhiăp ƀơi mông bưp mơnuih ƀon sang.

Ƀơi mông bưp, pô pơ ala khul khua pơ ala mơnuih ƀon sang mơng tơring čar Lâm Đồng hơmâo lăi pơthâo hơdôm tơlơi phun mơng mông jơnum pơ anăp, laih dong lăi pơthâo glăi hơdôm tơlơi dưi ngă amăng bruă bơwih ƀong - mơnuih mơnam 3 blan tal 1 thun 2022. Tui anun, mah hơmâo klin Covid-19, samơ̆ yua ngă bruă dưm kơnar amăng hrơi dêh čar ta brơi bơwih ƀong hơdip mơda glăi tui hơđăp, tơlơi bơwih ƀong huă mơnuih mơnam mơng lŏn ia rŭ glăi tañ mơn. Amăng anun, rơnoh đĭ kyar GDP đĭ, him lăng đĭ 5,03%, bruă bơwih brơi mơnuih mơnam đĭ 4,58%, đĭ 1,5 wơ̆t pơhmu hăng tơđar thun 2020-2021.

Hơjăn ƀơi Lâm Đồng, pơhrui glăi prăk kơ kơnuk kơna amăng 4 blan akŏ thun rơbêh 4.700 klai prăk, đĭ 4,76% pơhmu hăng tơđar; ƀing tuai hyu čuă ngui hơmâo rơbêh 2,3 klăk wơ̆t čô, đĭ 33% pơhmu hăng tơđar thun 2021. Mơnuih ƀon sang hơmâo rơkâo đĭ hơdôm bruă kiăng djŏp gưl ping gah, anom bruă pơsir brơi anun lĕ: bruă brơi hră yua lŏn dŏ kaih, bruă čuk pơkra mă yua lŏn aka ƀu rơđah mơn, aka ƀu djơ̆, tơnap čan prăk pioh ngă hmua pơkra gơnam...

Siu H’Mai: Pơblang