VOV4.Jarai - Čơtlăm lơ 14/3, Khua dêh čar ta ơi Phạm Minh Chính, Khua Grŭp črâo ba bruă pơgang, pơgăn klin Covid-19 dêh čar ta hmâo ngă lơphet bưp ƀô̆ mơta, bơni hơdôm bơnah gum hrom jar kơmar hmâo djru laih Việt Nam amăng bruă pơgang, pơgăn klin Covid-19 yua kơ Ding jum pơtom hiăp gum hrom hăng ƀirô Sang gum hơbit djop dêh čar ƀơi Việt Nam pơphun. Amăng mông bưp, Khua dêh čar ta ơi Phạm Minh Chính brơi thâo, thun 2022, Việt Nam hrưn đĭ lĕ thun dưi pơgăn klin ruă, amăng ƀrư̆ “pơplih hơđong phrâo” hăng klin Covid-19, pơtrut hơkrŭ glăi tañ, pơđĭ kyar bơwih ƀong – mơnuih mơnam kơjăp phik, tơnap him lăng, tơnap pơkă lăng hlâo, hăng jơlan gah pơgăn dong tơlơi lar hyu, ƀu dưi pioh rơgao hơnong bruă mă gah ia jrao, Việt Nam glăk ngă tañ amăng bruă tlâ̆o vaccine ară tal 3 kơ mơnuih rơbêh kơ 18 thun hăng ngă giong bruă tlâ̆o ară tal 2 kơ mơnuih mơng 12-17 thun; prăp lui tlâ̆o pơgang kơ čơđai muai mơng 5-11 thun, kơsem min tlâ̆o ară tal 4 hăng tlâ̆o brơi čơđai yŭ kơ 5 thun; kơtưn bôh thâo gah bruă ia jrao, biă ñu khul mă bruă pơgang hlôm hlâo hăng bruă ia jrao ƀơi plơi pla; pok pơhai ba glăi bôh tơhnal jơlan hơdră abih bang pơgang, pơgăn klin Covid-19 hmâo akô̆ tlôn./.

Siu H’ Prăk: Pơblang