Pơhiăp amăng mông jơnum Khua dêh čar lăi, gum pơgôp, djru nao rai tơlơi khăp pap, pơpŭ bruă ngă hiam, amra kah pơpha tơdruă djru mơnuih pơkŏn jing sa gru grua hiam yôm pơphăn mơ̆ng djuai ania ta, dưi hơmâo djop gưl rơnuk ană tơčô Việt Nam akŏ pơjing, djă pioh, pơbŭ tui laih anun dŏ glăi mơ̆ng rơnuk anai truh rơnuk pơkŏn, anun yơh anŏ ngă rai sa bruă mă hiam mơ̆ng ană mơnuih Việt Nam, pơjing rai pran kơtang hăng bruă ngă hiam klă, pơyơr čơđeh asar, hơtai boh, boh ƀleh amăng drơi jăn ta kơ pô pơkŏn lơ̆m ta rơngiă tơdơi anai, kiăng djru pơhơdip glăi kơ mơnuih ruă hlăk kiăng pơblih hơtai boh, boh ƀleh ƀudah čơđeh asar, alăk mơta pơjrao tơlơi ruă, anun lĕ gru grua hiam djuai ania Việt Nam ta ngă tui kah hăng ta brơi nao amra dŏ glăi hlong lar kiăng pơtrut pran jua hơdôm klăk čô mơnuih djop anih amăng dêh čar hơmâo ngă tui thun blan rơgao.

Khua dêh čar lăi pơtong, anai yơh anŏ bơngač, sa tơlơi lăp pơ-ư ang kơ bruă mă hiam, tơlơi pơmin klă, boh thâo ia rơgơi mơ̆ng ƀing ơi ia jrao, tơlơi thâo amăng bruă pơjrao duăm ruă, pơhơdip glăi ƀing ruă kơtang, yua ưi pơtlep brơi anŏ kơƀah amăng drơi jăn, pơtlep kiăng pơjrao duăm ruă ƀơi Việt Nam lăi pha, anom bruă gah ia jrao Việt Nam ta dưi ngă.