Khua dêh čar ơi Phạm Minh Chính phrâo git gai jơnum lok 5 Khul khua mua git gai mơ̆ng kơnuk kơna pơƀut bruă ngă tui Hră pơtrun 18 NQ/TW “Hơdôm mơta tơlơi ăt kiăng pơblih phrâo, dăp glăi sang bruă kơđi čar brơi hơbôt, mă bruă tŭ yua hloh, sit nik”.Ƀơi mông jơnum, Khul khua mua git gai hơmâo hmư̆ hră lăi pơthâo hăng pơčrong sai, pơgôp hiăp kơ hră čih pơthâo mơ̆ng Khul apăn bruă ping gah amăng kơnuk kơna dêh čar pioh pơdah đĭ hăng Ding jum kơđi čar kơ Akŏ bruă pơđut bruă mă mơ̆ng Khul apăn bruă ping gah kơnuk kơna hlâo kơ anun, akŏ pơdong ping gah phrâo amăng kơnuk kơna yua kơ anom bruă ping gah dêh čar pô git gai.

Tui hăng anăp či ngă bruă mơ̆ng Khul git gai ping gah dêh čar, anom bruă ping gah kơnuk kơna dêh čar hơmâo abih bang khul ping gah amăng djop ding jum, anom bruă ding kơna amăng kơnuk kơna dêh čar hăng hơdôm ping gah amăng group anom bruă pơprong, phun kông ty, sang bruă prăk sĭ mơdrô yua kơnuk kơna ngă pô. Klah čun ƀơi mông jơnum, Khua dêh čar jao kơ Ding jum bruă čar ngă hrŏm djop sang bruă pơdjơ̆ nao čih pioh hơdôm tơlơi pơgôp hiăp, ngă pơgiong hră čih hlâo pioh pơdah đĭ hăng Ding jum kơđi čar. Lơ̆m čih pơkra hăng ngă giong akŏ bruă, khom ngă tui tơpă hơdôm tơlơi phiăn pơkă kơ ping gah, tơlơi phiăn pơkă bruă git gai, djop tơlơi pơtrun mơ̆ng Ping gah hăng kiăo tui ten bruă mă sit nik rim hrơi amăng kơnuk kơna dêh čar.