Ƀơi mông jơnum, Ding jum akŏ bruă tuh pơ alin hơmâo lăi pơthâo Tơlơi pơsit mơ̆ng Khua dêh čar kơ akŏ pơdong Khul git gai črâo bruă kual lŏn dăo ia krông Hồng. tui anun, Khul pơčrâo bruă kual hơmâo pơsit ƀu djơ̆ anom ngă bruă čih pơkra hră pơ-ar tơlơi phiăn kơnuk kơna ôh samơ̆ anai lĕ hơbô̆ bruă tŭ yua či sem lăng, pơsit hơdôm bruă yôm phun mơ̆ng kual, djru pơsir hĭ hơdôm tơlơi aka ƀu djơ̆ mơ̆ sa boh tơring ƀu dưi pơsir, laih dong dưi pơsir hĭ hơdôm tơlơi aka ƀu hơmâo abih bang tŭ ư hrŏm ƀudah rơgao kơ tơlơi dưi pơsir mơ̆ng hơdôm ding jum, anom bruă hăng tơring čar amăng kual.

Kual lŏn dăo ia krông Hồng hơmâo pơsit jing kual pơđĭ kyar tañ, hơđong kơjăp, amăng anun, Plơi prong jưh jom Hà Nội “Gru hiam mơ̆ng đưm hlâo - Rơgơi - Pơplih phrâo”, jing anih phun, pơtrut pơđĭ kyar amăng kual wơ̆t hăng đơ đam dêh čar, gir pơđĭ kyar dưm kơnar hăng plơi prong jưh jom amăng kual. Ƀơi mông jơnum anai, khua mua hơdôm ding jum, anom bruă bơkơtuai, pơčrong sai hăng čih pơkra hơdră pơkă hơnong akŏ pơjing kual ia krông Hồng rơwang thun 2021-2030, lăng nao truh pơ thun 2050 hăng tơlơi pơđĭ kyar, lăng nao sui thun, pơtruh nao rai, dưm kơnar, tŭ yua, hăng hơđong kơjăp.