VOV4.Jarai - Mơguah lơ 1/7 ƀơi Dak Lak, Khua dêh čar ơi Phạm Minh Chính git gai Jơnum klah čun ngă tui tơlơi pơtrun mrô 10-NQ/TW lơ 18/1/2002 hăng tơlơi klah čun mrô 12-NQ/TW lơ 24/10/2011 mơng Ding jum kơđi čar kơ bruă pơđĭ kyar bơwih ƀong huă mơnuih mơnam hăng pơhlôm hơđong amăng kual Dap kơdư. Amăng mông jơnum, ƀing khua mua đing nao pơlăi nao rai, lăng glăi bruă pơphun hăng boh than dưi ngă, hơdôm anŏ aka ƀu klă hăng anŏ ba truh tơdơi kơ 20 thun ngă tui tơlơi pơtrun mrô 10-NQ/TW hăng tơlơi klah čun mrô 12-KL/TW; pơsit tơlơi gơgrong, tơlơi dưi, tơlơi yôm hăng tơlơi bơbeč nao mơng kual Dap kơdư hăng bruă pơđĭ kyar bơwih ƀong huă- mơnuih mơnam, pơhlôm hơđong amăng kual hrŏm hăng kual Ngŏ dơnung, ter hang ia rơsĭ kual tong krah, guai tlâo boh dêh čar Việt Nam - Lao - Kur hăng đơ đam dêh čar…

Khua dêh čar ơi Phạm Minh Chính đĭ pơhiăp amăng mông jơnum

Đĭ pơhiăp amăng mông jơnum, Khua dêh čar ơi Phạm Minh Chính lăi nao tong ten tơlơi dưi, tơlơi gal prong hloh laih dong lăi nao hơdôm anŏ aka ƀu klă. Khua dêh čar lăi pơtong: Pơđĭ kyar kual Dap kơdư kiăng đing nao hăng pơlir hơbit pơsir hĭ ha amăng plĕ kơ bruă kơđi čar, tơlơi pơmĭn, bruă bơwih ƀong, mơnuih mơnam, ayuh hyiăng, pơhlôm hơđong; pơlir hăng bruă ngă klă dong amăng pơsir hơdôm bruă amăng mơnuih mơnam, hơdră djru djuai ania, tơlơi đăo; pơsur pran pơ-ư pơ-ang, lăng tơlơi yôm mơng gru grua ngă hơkrŭ, pran kơtang hrưn đĭ hajăn, thâo gum pơgôp mut hrŏm jing anŏ pơsur pơđĭ kyar.

Siu Đoan: Pơblang