VOV4.Jarai - Mơguah lơ 1/3, ƀơi Ƀirô mă bruă Kơnuk kơna, Khua dêh čar ta ơi Phạm Minh Chính git gai jơnum lăng nao rai mơng ataih Kơnuk kơna hăng hơdôm bôh tơring čar, ƀôn prong, hmư̆ tơlơi lăi pơthâo glăi bruă kơsem min ngă tui hăng 5 rơwang bruă jơlan nao rai phun anun lĕ: jơlan bĕ 4 Kual plơi prong jưh jom Hà Nội; jơlan bĕ 3 ƀôn prong Hồ Chí Minh; jơlan đuăi hmar Châu Đốc – Cần Thơ – Sóc Trăng; jơlan đuăi hmar Khánh Hoà – Buôn Ma Thuột; jơlan đuăi hmar Biên Hòa – Vũng Tàu. Amăng mông jơnum, Khua dêh čar ta ơi Phạm Minh Chính lăi rơđah, 5 rơwang bruă jơlan nao rai dưi pel ĕp tal anai leng kơ hơdôm glông jơlan yôm phăn anun lĕ jơlan tô hơdôm anih anom phun bơwih ƀong prong, hơdôm glông jơlan phun mơng hơdôm kual, tơring čar, ƀôn prong... Bruă pok pơhai pơdŏng 5 rơwang bruă anai bơdjơ̆ nao lu tơlơi, lu tơring čar, ƀôn prong hăng lu mơnuih ƀôn sang. Yua anun Khua dêh čar rơkâo ƀing khua pơ ala nao pơhmư̆ khom đing nao kơsem min tŏng ten, lu mơta kiăng hmâo bôh tơhnal prong./.

Siu H’ Prăk: Pơblang