VOV4.Jarai - Mơguah lơ 24/3, Khua dêh čar ơi Phạm Minh Chính git gai Jơnum lăng nao rai amăng tivi hăng anom bơwih ƀong kơnuk kơna kơ “Pơplih phrâo, pơđĭ tui anŏ klă mơng bruă mă đah mơng pơhrui tơlơi hơmâo mơng anom bơwih ƀong kơnuk kơna amăng pơđĭ kyar bơwih ƀong huă - mơnuih mơnam”. pơhiăp ƀơi mông jơnum, Khua dêh čar ta črâo rơđah, Jơnum hơmâo pơphun amăng hrơi mông dêh čar glăk ngă tui Jơlan hơdră rŭ glăi tơlơi bơwih ƀong tui Tơlơi pơtrun jơnum Ping gah, Khua git gai pơ ala mơnuih ƀon sang dêh čar hăng Kơnuk kơna. Kơnuk kơna glăk ngă tŭ yua tơlơi pơtrun “Hơdip hrŏm rơnuk rơnua, hơdeč hmar, pơgang klă klin Covid-19”, ngă atur rŭ pơdong tañ, pơđĭ kyar hơđong kơjăp bơwih ƀong huă mơnuih mơnam.

Kơnuk kơna pơsit anom bơwih ƀong kơnuk kơna ngă phun akha, jing anom bruă yôm phun mơng tơlơi bơwih ƀong dêh čar ta, gum pơgôp ngă hơđong tơlơi bơwih ƀong prong hăng pơtrut đĭ kyar bơwih ƀong huă mơnuih mơnam. Rơngiao kơ anun, Khua dêh čar ta pơtă hlâo, Kơnuk kơna kiăng pơčrông sai, ba hơdôm akŏ bruă, hơdră ngă bruă rơđah rơđông kơ rim ding jum, anom bruă, rim grup, kông ti, anom bơwih ƀong kơnuk kơna đah mơng hơmâo tơlơi pơmin lăp djơ̆, hơdră ngă bruă lăp djơ̆, ngă bruă khut khăt hloh, tŭ yua hloh.

Siu H’Mai: Pơblang