VOV4.Jarai-Mơguah lơ 14/9, ƀơi Hà Nội, Khua dêh čar ơi Phạm Minh Chính git gai jơnum pơsit glăi pơkă hnong abih bang amăng dêh čar mơ̆ng thun 2021-2030, lăng nao pơ anăp adih truh thun 2050. Pơhiăp amăng mông jơnum git gai, Khua dêh čar ơi Phạm Minh Chính lăi, bruă mă pơkă hnong yôm biă mă. Pơkă hnong abih bang amăng dêh čar anai kiăng biă mă, kiăng ngă djơ̆ lăp jơlan hơdră tơlơi pơtrun mơ̆ng Jơnum ruah khua ping gah dêh čar ta tal XIII, ngă tui jơlan hơdră pơtrun kơ dêh čar amăng rơnuk đĭ nao jơlan hơdră mơnuih mơnam bơkơnar, hơdôm hră pơtrun mơ̆ng gơnong glông, boh nik ñu hră pơtrun jơnum tal XIII mơ̆ng ping gah.

Anai lĕ, tal blung a, Việt Nam ngă tui akŏ bruă pơkă hnong ƀơi dêh čar kiăng pơtong glăi boh tŭ yua, abih bang bruă mă anih dŏ, plơi pla, mơ̆ng anun dăp hơdră pơjing anih pơđĭ kyar lŏn ia, pok jơlan pơđĭ kyar phrâo, anŏ gêh găl pơđĭ kyar phrâo, pran kơtang pơtrut pơđĭ kyar phrâo dưi ngă djơ̆ tơhnal pơkă, anŏ kiăng amăng Hră pơtrun ping gah dêh čar tal XIII hơmâo pơtong rơđah, truh thun 2045 amra jing dêh čar pơđĭ kyar, pơhrui glăi lu hloh.

Nay Jek: Pơblang