VOV4.Jarai - Mơguah lơ 14/4, ƀơi Ƀirô mă bruă Gong gai dêh čar ta, Khul wai lăng pơplông apah pri dêh čar ta rơwang bruă mơng thun 2021-2026 jơnum lok 2 gah yŭ tơlơi git gai mơng Khua dêh čar ta ơi Phạm Minh Chính, Khua Khul. Tơdơi kơ hmư̆ hơdôm tơlơi gum pơhiăp bơkơtuai, klah čun mông jơnum Khua dêh čar ta čih djă pioh, pơsit yôm hăng bơni pran jua gơgrong mơng ding kơna amăng Khul – hmâo laih hơdôm bruă mă sit nik, ba glăi bôh tơhnal, hmâo lu tơlơi gum hơgôp klă bruă bơkơtưn – bơni apah pri.

Gah bruă mă, jơlan pơsir phun thun 2022, Khua dêh čar ta črâo rơđah: Pơphun bruă bơkơtưn sit nik, ba glăi bôh tơhnal, kiăo tui hơdôm tơhnal pơkă, tơlơi pơsit jơlan gah pơđĭ kyar bơwih ƀong – mơnuih mơnam hmâo ba tơbiă amăng Tơlơi pơtrun pơsit tal 13 mơng Ping gah, Tơlơi pơtrun pơsit mơng Khul Khua pơ ala mơnuih ƀôn sang dêh čar, Gong gai dêh čar, Tơlơi pơtrun pơsit Jơnum Ping gah hăng Tơlơi pơtrun pơsit Khul pơ ala mơnuih ƀôn sang hơdôm gưl. Pơplih phrâo dong bruă bơkơtưn, pơkĕ kơjăp hăng ngă tui bruă kơđi čar mơng ding jum, gơnong bruă, tơring čar, ƀôn prong tui pran jua Gong gai dêh čar hmâo ba tơbiă thun 2022 lĕ “Gum hrom hơbit, gơgrong hlâo ngă juăt, pơhlôm ba glăi bôh tơhnal, hơkrŭ glăi pơđĭ kyar”./.

Siu H’ Prăk: Pơblang