VOV4.Jarai - Mơguah lơ 12/7, ƀơi sang bruă Kơnuk kơna, Khua dêh čar ơi Phạm Minh Chính git gai mông ngă bruă kơplah wah Khua mua Kơnuk kơna hăng Ping gah khul anom bơwih ƀong Dêh čar kơ bruă git gai, črâo bruă pơplih glăi, pơđĭ tui bruă mă mơng anom bơwih ƀong kơnuk kơna. Pơhiăp ƀơi mông ngă bruă, Khua dêh čar ơi Phạm Minh Chính brơi thâo anai jing hrơi mông či bơkơtuai pơphun ngă Tơlơi pơtrun jơnum Ping gah dêh čar tal 13 hăng Ping gah Khul anom bơwih ƀong Dêh čar ta, biă ñu lĕ pơtŏng glăi, lăng glăi hơdôm tơlơi dưi ngă mơng hơdôm grup bơwih ƀong, phun kông ti kơnuk kơna prong; bơkơtuai, pơsir hĭ hơdôm tơlơi aka ƀu djơ̆.

Amăng hrơi blan pơ anăp, Khua dêh čar kiăng, Ping gah khul anom bơwih ƀong pơjing tơlơi gun jing tơlơi gêh gal, gơgrong bruă, gir hloh, ngă bruă khut khăt hloh, ngă bruă djơ̆ phun tơhnal. Kơsem min dưm dăp giong mơnuih ngă bruă amăng anom bơwih ƀong kơnuk kơna pơplih phrâo, tŭ yua, kơsem min hơdră ngă bruă, hơdră djru, pơgang ba ƀing khua khin pơmin khin ngă.

Siu H’Mai: Pơblang