VOV4.Jarai-Mơguah lơ 10/8, Khua dêh čar ơi Phạm Minh Chính, Khua khul git gai mơ̆ng Kơnuk kơna  djop bruă, kơčăo bruă yôm, phun gah bruă jơlan glông pơdŭ pơgiăng, git gai jơnum mơ̆ng ataih lăng nao rai amăng tivi. Jơnum ăt pơtruh nao rai mơ̆ng anom bruă Kơnuk kơna anih phun pơtruh nao pơ djop jơnum min mơnuih ƀôn sang 33 boh tơring čar, ƀôn prong hơmâo kơčăo bruă, ring bruă phun. Ƀơi mông jơnum lok sa, Khua dêh čar ơi Phạm Minh Chính lăi, kiăng pok pơhai khut khăt hloh 3 mơta bruă yôm, amăng anun pơkra jơlan phun, pơtum kiăng hơmâo jơlan hiam, pơtruh nao rai djop kual, djop tơring čar.

Mông jơnum abih bang

Ră anai, kơ rơnoh prăk tuh pơ alin hlăk pok pơhai hmar biă mă yua pơhrŏ hĭ laih mrô bruă kiăng tuh pơ alin trun dŏ 5000 kơčăo bruă, pơtum nao kơčăo bruă prong hăng pơtum lu rơnoh prăk mơ̆ng gơnong dlông, tơring čar, pơtum rơnoh prăk ƀiă thun, rơnoh prăk rŭ glăi hăng pơđĭ kyar bơwih ƀong huă mơnuih mơnam, rơnoh prăk pơkrem pioh yua mă ƀiă. Khua dêh čar brơi thâo, kiăng ngă atur pran kơtang, khom akŏ pơjing Khul git gai mơ̆ng kơnuk kơna git gai ngă bruă tui hluai tơlơi thâo bruă jao, tơlơi dưi glăm ba mơ̆ng kơnuk kơna, ƀing khua mua, anom bruă, tơring čar kiăng tô glăi djop ring bruă, pioh krăo lăng, pơtrut ngă bruă, rơkâo hơdră pơsir hơdôm dŏ gun.

Nay Jek: Pơblang