VOV4.Jarai - Tlam lơ 2/3, ƀơi Ƀirô Kơnuk kơna, Khua dêh čar ơi Phạm Minh Chính, Khua jơnum min dêh čar amăng pơplih mă yua boh thâo phrâo git gai jơnum lăi pơthâo boh tơhnal blung a hăng bruă jao, hơdră pơtrut pok pơhai akŏ bruă pơđĭ kyar mă yua anih djă pioh hră pơ-ar mơnuih ƀon sang hăng pơsit mă yua măi điện tử djru pơplih boh thâo mrô amăng dêh čar rơwang thun 2022-2025, anăp nao thun 2030 (arăng iâu klah čun akŏ bruă 06).

Pơhiăp pơđut mông jơnum, Khua dêh čar ơi Phạm Minh Chính pơsit tong: Bruă ngă tui akŏ bruă 06 lĕ ha bơnah ngă tui tơlơi pơplih phrâo amăng man pơkra anih anom hơmâo Jơnum Ping gah tal XIII pơsit; pơgôp pơplih mă yua boh thâo phrâo, pơjing Kơnuk kơna mrô, mơnuih mơnam mă yua boh thâo phrâo. Kơ bruă yôm phun pơ anăp anai, Khua dêh čar git gai djop ding jum, gơnong bruă, Jơnum min mơnuih ƀon sang hơdôm tơring čar, ƀôn prong ječ ameč pok pơhai akŏ bruă, amăng anun kiăng pok pơhai djop boh tơhnal, phara bruă brơi tong ten kiăng pơphun ngă tui djơ̆ hrơi mông pơkă amăng djop bruă jao. Pơtrut tañ amăng pơjing hăng pơgiong hơdôm  črăn tơlơi phiăn bơdjơ̆ nao bruă ngă tui hơdôm boh tơhnal mơng akŏ bruă anai.

Siu Đoan: Pơblang