VOV4.Jarai - Lơ 17/4, Khua dêh čar ơi Phạm Minh Chính hăng grup hyu mă bruă mơng Kơnuk kơna hơmâo mông mă bruă hăng Khua mua pơprong amăng tơring čar Ninh Thuận kơ bruă mă, boh than ba glăi lơ̆m ngă tui bruă jao thun 2021, rơwang tal I/2022 hăng anăp nao truh thun 2022; boh than dưi ngă 3 thun lơ̆m ngă tui tơlơi pơtrun mrô 115 mơng Kơnuk kơna.

Đĭ pơhiăp amăng mông mă bruă, Khua dêh čar ơi Phạm Minh Chính brơi thâo mông jơnum kiăng lăng glăi hơdôm bruă tơring čar Ninh Thuận dưi ngă, hơdôm bruă aka ƀu dưi amăng thun blan laih rơgao, sem lăng tơlơi gun găn, hơmâo hơdră pơplih, hơnong pơkă, tơlơi git gai, jơlan hơdră prong amăng thun 2022 hăng hơdôm thun pơ anăp dong; tui tơlơi pơtrun mơng Jơnum Ping gah tal XIII, akŏ bruă amăng 5 thun, akŏ bruă 10 thun pơđĭ kyar bơwih ƀong huă - mơnuih mơnam amăng dêh čar, tơlơi pơtrun mơng Jơnum Ping gah tơring čar, hơdôm tơlơi pơsit bruă mă mơng gơnong glông, kiăng pơphun ngă tui hơdeč hmar, lăp djơ̆ hluai tui tơlơi sit nik ƀơi ƀon lan. Pơ anăp anai, tơring čar kiăng ngă tui hơdôm tơlơi dưi, tơlơi gal  kiăng bơkơtưn, lăng tơlơi lông jing tơlơi dưi, lăng hơdôm tơlơi dưi kar hăng anŏ pơtrut pơsur, ba glăi hơdôm tơlơi pơplih amăng pơđĭ kyar, tơlơi hơdip jai trơi pơđao, yâo mơ-ak kơ mơnuih ƀon sang.

Siu Đoan: Pơblang