VOV4.Jarai - Ăt amăng mơguah lơ 28/4, Khua dêh čar ơi Phạm Minh Chính hơmâo nao čuă, pơ alum pran jua hăng ƀơk gơnam brơi ƀing čơđai sang hră tơnap tap ƀơi Sang hră kơnuk kơna čem rông ba gưl tlâo Huỳnh Cương, tơring čar Sóc Trăng. Hiăp bit hăng Khua mua tơring čar Sóc Trăng laih dong khua git gai sang hră, Khua dêh čar ta pơpŭ pran jua gir kơtir amăng pơtô hrăm mơng ƀing nai pơtô, čơđai sang hră, yua kơ gir găn rơgao tơnap tap, gir run rĭm hrơi kiăng pơtô hrăm klă hloh.

Lăi glăi tơlơi pơtăn mơng Wa Hồ “Yua kơ tơlơi dưi 10 thun pla kyâo, yua kơ tơlơi dưi hơdôm rơtuh thun pơtô hrăm čơđai”, Khua dêh čar čang rơmang ƀing nai pơtô hăng čơđai hrăm hrăm sang hră Huỳnh Cương amra tŏ tui gru grua, pơđĭ kyar djop mơta, ba glăi lu tơlơi dưi amăng pơtô hrăm. Khua dêh čar čang rơmang hăng đăo gơnang, hăng tơlơi đing nao mơng Khua mua djop gưl, tơlơi đăo gơnang hăng čang rơmang mơng ƀing amĭ ama, pran khăp pap mơng nai pơtô, pran jua hur har mơng hlăk ai, ƀing čơđai hrăm hră amra gir run hrăm rơgơi kiăng pơplih tơlơi hơdip ƀing gơñu, pơgôp pơjing plơi pla, lŏn ia ta jai hrơi pơdrong asah.

Siu Đoan: Pơblang