VOV4.Jarai-Tlam lơ 24/1, ơi Phạm Minh Chính, Khua dêh čar hăng grup hyu mă bruă nao čuh ñang, dưm guang bơnga ƀơi sang hơdor pioh kơ Khua mir sir Hồ Chí Minh, dưm guang bơnga hăng h’ŭ kơ mơnuih khin hơdai mơ̆ng djuai ania ơi Lê Lợi ƀơi plơi prong Thanh Hóa; nao čuă, mă bruă hăng pơpŭ thun phrâo kơ khua mua, tơhan kông an Thanh Hóa.

Nao čuă hăng pơpŭ thun phrâo kơ kông an Thanh Hóa lĕ, Khua dêh čar pơtă: Tơlơi pơhing thun 2022 dŏ lu tơlơi tơnap tap đôč, yua kơ anun, anăm ngă amưng ôh amăng bruă mă, kơñ ƀu kơđiăng, khom prăp lui pran jua, gơnam tam mă bruă, git gai pơčrâo ba, pơphun bruă mă klă hloh kơ thun hlâo. Khua dêh čar lăi rơđah, bruă mă gleng nao hlâo hloh lĕ pơhlôm, pơgang klin, amăng anun, khom pơtum kơ bruă mă tlâ̆o vaccine djop, tơhan kông an hrom hăng lu tơhan pơkŏn khom nao tơl sang, phyiang tơl adring, lăi pơthâo djop mơnuih, pioh tlâ̆o vaccine kơ mơnuih ƀôn sang.

Khua dêh čar rơkâo kông an Thanh Hóa khom thâo tong ten tơlơi pơhing, lăi pơthâo kơ khua mua ping gah, gong gai kơnuk kơna plơi prong, tơring čar, git gai ngă bruă; wai lăng tong ten bruă kơnuk kơna pơtrun pơgang rơnuk rơnua, pơtô lăi, pôr pơthâo, pơphun bruă ngă tui gơgrong kjăp, prăp lui pran jua blah ngă, pơgang tơlơi rơnuk rơnua kơ ană plơi, tơlơi hơdip mơda, tơlơi rơnuk rơnua kơ mơnuih ƀôn sang.

Nay Jek: Pơblang