Rơgao mơ̆ng anai 30 thun pơ klôn adih, hơdôm wơ̆t por nao rai mơ̆ng Sang bruă rơdêh por dêh čar Việt Nam hơmâo pơphun pơgiăng tuai por mơ̆ng ƀôn prong Hồ Chí Minh, hlong nao tơpă truh pơ Seoul, plơi prong jưh jom Hàn Quốc. Truh ră anai, anom bruă rơdêh por anai hơmâo yua 6 jơlan dưi por nao truh pơ Hàn Quốc mơtam anun lĕ, mơ̆ng Hà Nội, ƀôn prong Hồ Chí Minh-Seoul; Hà Nội, ƀôn prong Hồ Chí Minh por nao tơpă pơ Busan; Đà Nẵng-Seoul hăng Cam Ranh-Seoul, hăng rơnoh pơkă yap lăng hơmâo năng ai  truh 112 wơ̆t por nao rai sa wơ̆t hrơi tơjuh.

Pơhiăp ƀơi mông jơnum prong anai, Khua dêh čar ơi Phạm Minh Chính lăi pơtong tơdơi kơ rơbêh 30 thun akŏ pơdong, pơjing bruă ngă giăng mah pŭ ƀăn Việt Nam-Hàn Quốc pơđĭ kyar hiam klă, jing dua bơnah ngă hrŏm yôm phara, hlom bom kơ tơdruă, hơmâo 5 mơta bruă ƀuh rơđah; đăo kơnang bruă kơđi čar kjăp, lir hơbit ană mơnuih, mut phung bơwih ƀong huă, djơ̆ hrŏm gru grua, hrŏm hơbit kiăng man pơdong lŏn ia kjăp kơtang, hing ang pơdrong sah, mơnuih ƀôn sang mơak mơai, trơi pơđao.