VOV4.Jarai-Tŭ ư tơlơi jak iâu mơ̆ng Khua mua kơnuk kơna Nga, Khua dêh čar ơi Phạm Minh Chính nao jơnum hrom pơčrông bơwih ƀong huă kual Ngŏ pơphun ƀơi Vladivostok dêh čar Nga tui hơdră đĭ pơhiăp mă rup video hlâo. Amăng tơlơi đĭ pơhiăp, Khua dêh čar lăi jơnum pơčrông sai anai yôm biă mă kiăng kơtưn ngă hrom jar kmar, djru ngă hơđong, gum nao rai hăng pơđĭ kyar ƀơi kual ASIA-Thái Bình Dương hăng rŏng lŏn tơnah. Khua dêh čar lăi, Việt Nam ngă hrom man pơdong atur bơwih ƀong huă rơngai ngă pô hăng hur har mut phung jar kmar prong hloh, tŭ yua.

Khua dêh čar ơi Phạm Minh Chính nao jơnum hrom Bơwih ƀong huă kual Ngŏ đĭ

pơhiăp mă rup Video ba pơdah

Kơ tơlơi bơwih ƀong huă dua bơnah Việt Nam-Nga, Khua dêh čar lăi pơtong: lăng yôm na nao tơlơi ngă giăng mah hlom bom hăng Nga, lăng yôm boh tơhnal ngă hrom bơwih ƀong huă dua bơnah hơdôm thun blan rơgao, boh nik ñu amăng bruă apui lơtrik, ia jâo, pơkra măi mok hăng lu bruă mă pơkŏn. Ƀing gơmơi čang rơmang ăt pơtrut ngă hrom hăng lu bruă, lu mơta  hloh dua bơnah hơmâo tơlơi gêh găl, mơneč mă anŏ gêh găl đut tơhnal mơ̆ng bruă pok pơhai Hră pơkôl sĭ mơdrô rơngai kơplah wah Việt Nam hăng khul bơwih ƀong hrom kual ASIA hăng Mi kô̆. Khua dêh čar lăi, Việt Nam hok mơak bruă lir hơbit bơwih ƀong huă dêh čar Nga, biă mă ñu kual gah Ngŏ, hơmâo hơdôm dêh čar kual ASIA –Thái Bình Dương, pơtrut ngă giăng mah hlom bom ASEAN-Nga.

Nay Jek: Pơblang