Hrơi anai (8/10), tŭ ư hăng tơlơi jak iâu mơng Khua dêh čar Lao Sonexay Siphadone-Khua git gai kual ASEAN thun 2024, Khua dêh čar ơi Phạm Minh Chính ba jơlan hlâo khua mua pơprong mơng Việt Nam nao Jơnum khua mua kual ASEAN tal 44, 45 hăng hơdôm Jơnum khua mua bơdjơ̆ nao ƀơi Vientaine, Lao, dong mơng lơ 8-11/10. Anai lĕ hơdôm bruă mă yôm hloh mơng ASEAN amăng thun anai, hơmâo tơlơi mut hrŏm mơng khua mua hơdôm boh dêh čar kual ASEAN, Timor-Leste hăng 10 anom ngă gŏp mơng kual ASEAN, hrŏm hăng tuai arăng jak iâu lĕ ƀing pơ ala hơdôm grup amăng jar kmar hăng amăng kual.

Hăng anăn pơphun “ASEAN: Pơtrut pơlir hơbit hăng pơtrut pran kơtang”, ƀing khua mua amra đing nao pơlăi nao rai hơdôm bruă yôm phăn, jê̆ giăm hăng kual ASEAN hăng amăng kual jum dar, pơtrut bơkơtuai, ngă hrŏm dơlăm tui, pơlir kjăp, tŭ mă tơlơi dưi hăng găn rơgao tơlơi lông. Hăng pran gơgrong amra pơgôp hăng gir run abih pran jua kiăng ba glăi tơlơi truh kih hrŏm, grup khua mua mơng Việt Nam yua Khua dêh čar ơi Phạm Minh Chính ba jơlan hlâo nao jơnum tal anai, kiăng lăi pơthâo hơdôm pơsit yôm kơ kual ASEAN hăng bruă pơgi kơdih ƀơi kual ASEAN.