VOV4.Jarai - Mơguah (12/1), Khua dêh čar ơi Phạm Minh Chính nao jơnum hăng git gai mông jơnum lăng glăi bruă mă amăng thun 2021 hăng pok pơhai bruă mă amăng thun 2022 amăng gơnong pơphun bruă mă, yua Ding jum pơphun bruă pơphun lăng nao rai mơng ataih hăng 63 boh tơring čar, ƀôn prong. Đĭ pơhiăp amăng mông jơnum, Khua dêh čar ơi Phạm Minh Chính tŭ yap hăng pơpŭ hơdôm boh than dưi ngă mơng gơnong pơphun bruă mă amăng thun 2021, pơgôp prong prin amăng pơđĭ kyar hrŏm kơ dêh čar ta.

Hrŏm hăng anun Khua dêh čar ăt lăi nao rơđah hơdôm anŏ aka dưi ngă mơng gơnong pơphun bruă anun lĕ bruă pơjing hơdră bruă aka ƀu lăp djơ̆ hăng tơlơi rơkâo, tơlơi kiăng sit nik ră anai. Pơ anăp anai, Khua dêh čar rơkâo, pơplih phrâo hăng pơjing hơdră wai lăng mơnuih apăn bruă, mơnuih mă bruă pơhlôm ha amăng plĕ, lăp djơ̆ hrŏm amăng djop anom bruă kơđi čar hăng pơjing hơdră pơlir măng mơnuih apăn bruă gưl să hăng gưl tơring glông, gưl tơring čar. Pơphô bruă kiăng kơ dưm dăp mơnuih mă bruă, pơjing bruă mă klă hloh, lăp djơ̆ tui ră anai.

Siu Đoan: Pơblang