VOV4.Jarai - Tlam lơ 6/2, tŏ tui bruă pel ĕp, pơsur man pơkra jơlan phun kơ gơnong bruă wai lăng jơlan glông, Khua dêh čar ơi Phạm Minh Chính hơmâo nao pel ĕp, pơtrut pơsur, hmư̆ lăi pơthâo, pơsir hĭ hơdôm bruă tơnap tap, gun găn hăng pơsur, pơpŭ thun phrâo ƀing mơnuih apăn bruă, kông nhơn glăk mă bruă ƀơi ară jơlan rơdêh đuăi hmar Mỹ Thuận - Cần Thơ hăng bruă man pơkra tơdrông Mỹ Thuận 2. Jơlan rơdêh đuăi hmar Mỹ Thuận - Cần Thơ găn nao 2 boh tơring čar Vĩnh Long, Đồng Tháp. Tơdơi kơ jơlan anai giong, amra pơkuh nao jơlan mơng ƀôn prong Hồ Chí Minh - Trung Lương, Trung Lương - Mỹ Thuận hăng tơdrông Mỹ Thuận 2, amra pơjing rai jơlan rơdêh đuăi hmar mơng ƀôn prong Hồ Chí Minh - Cần Thơ, pơgôp plai ƀiă tui rơdêh đuăi nao rai amăng jơlan mrô 1. Ƀơi anai, Khua dêh čar rơkâo tơring čar Vĩnh Long hăng tơring čar Đồng Tháp ječ ameč pơgiong bruă pok jơlan; hơdôm bơnah bơdjơ̆ nao kiăng gum hrŏm kjăp kiăng tañ ƀiă pơgiong 3 blan hăng pơhlôm man pơkra brơi kjăp. Khua dêh čar sa wŏt dong pơtă pơtăn bruă pơphun man pơkra jơlan rơdêh đuăi hmar kiăng  brơi tơpă kiăng rơdêh đuăi nao rai giăm hloh; laih dong, djop ƀon lan tŏ tui pran ngă mă pô, tuh pơ alin brơi djơ̆ bruă, anăm dŏ tơguăn mơng Kơnuk kơna amăng bruă man pơkra jơlan rơdêh đuăi hmar.

Siu Đoan: Pơblang