VOV4.Jarai - Tŭ ư tơlơi jak iâu mơng Khua dêh čar Japan Kishida Fumio, Khua dêh čar ta ơi Phạm Minh Chính nao pơhmư̆ hăng pơhiăp mơng ataih ƀơi mông Jơnum khua mua prong tal 4 kual ASIA - Thái Bình Dương kơ ia yua. Pơhiăp ƀơi mông jơnum, Khua dêh čar ơi Phạm Minh Chính lăi nao hơdôm tơlơi bơdjơ̆ nao rai aka ƀu phiah ƀuh djơ̆ ôh mơng hlâo hơdôm tơlơi lông prong kah hăng klin Covid-19, tơlơi truh lŏn adai ngă, ayuh hyiăng pơplih, mă yua rơgao đơi kông ngăn lŏn adai amăng anun hơmâo ia, glăk ba truh lu tơlơi răm ƀăm prong biă kơ rơnuk anai hăng rơnuk tơdơi, khŏm kiăng ƀing ta lăng glăi, pơsir hĭ. Khua dêh čar pơsit amăng thun blan rơgao, Việt Nam lêng gir gum ngă hăng pơgôp hrŏm djŏp bruă ngă hrŏm jar kmar, biă ñu hăng hơdôm boh dêh čar hơmâo glông ia rô hrŏm hăng Việt Nam hăng Lao, Kur, Khač laih anun ngă hrŏm jar kmar či wai lăng, pơđĭ kyar, pơgang ba hăng mă yua hơđong, tŭ yua, klă kơ dua bơnah hơdôm ia yua mơng ia krông, čroh hnoh.

Siu H’Mai: Pơblang