VOV4.Jarai - Mơguah lơ 4/8, ƀơi Hà Nội, Sang bruă prăk dêh čar Việt Nam pơphun jơnum Pơplih mă yua mrô gah bruă prăk. Khua dêh čar ơi Phạm Minh Chính nao pơhmư̆ hăng git gai bruă mă ƀơi mông jơnum anai. Pơhiăp ƀơi mông jơnum, Khua dêh čar ơi Phạm Minh Chính lăi, pơplih mă yua mrô jing tơlơi khŏm hơmâo, laih anun ƀing ta khŏm ngă yơh. Ping gah, Kơnuk kơna ta lăng yôm biă laih anun lăng anai kah hăng sa amăng hơdôm bruă yôm phun hloh.

Khua dêh čar hơmâo pơsit laih Jơlan hơdră pơplih phrâo mrô dêh čar truh thun 2025, anăp nao truh thun 2030. Hăng pran jua pơplih mă yua mrô abih bang, hơmâo mơnuih ƀon sang, anom bơwih ƀong, kơnuk kơna gum ngă, samơ̆ khŏm ngă gơñăm nao bruă yôm phun; bơ anom bruă prăk hơmâo djŏp tơlơi gêh gal dưi nao hlâo ngă tui. Khua dêh čar kiăng pơtrut pôr pơhing kơ tơlơi gêh gal mơng pơplih phrâo mrô amăng gah bruă prăk kiăng mơnuih ƀon sang, anom bơwih ƀong thâo hluh hloh kơ tơlơi gêh gal hăng anŏ klă mơng bruă anai.

Siu H’Mai: Pơblang