Khua dêh čar lăi rơđah, Kơnuk kơna glăk khut khăt, đing nao git gai pơsir hĭ khut khăt hơdôm bruă, akŏ bruă dŏ đôm glăi sui thun, gir run pơsir hĭ hơdôm tơlơi tơnap tap, gun găn, amăng anun hơmâo hơdôm boh tơhnal amăng bruă wai lăng mơng ding jum ia jrao. Hăng akŏ bruă man pơdong sang ia jrao mrô 2 mơng Sang ia jrao Bạch Mai, sang ia jrao Việt Đức, Khua dêh čar git gai hơdôm ding jum ia jrao, man pơdong, ling tơhan, kông ang tui tơlơi glăm ba, bruă jao git gai hơdôm anom bruă bơdjơ̆ nao đing nao mă yua djop ngăn rơnoh, ngă tui ha amăng plĕ, khut khăt, tŭ yua kiăng ječ ameč pơsir giong hơdôm bruă đôm glăi, hơdôm anih ngă gun, tañ ba 2 boh sang ia jrao mă yua amăng rơwang tal II thun 2026.

Khua dêh čar ơi Lê Minh Hưng rơkâo Ding jum ia jrao ječ ameč pơgiong črăn tơlơi phiăn pơhlôm mơnong ƀong huă hơdjă (čih pơkra glăi) hăng pơgiong hơdră wai lăng kơnuk kơna amăng pơhlôm mơnong ƀong huă hơdjă; pơjing akŏ bruă, jơlan gah pok pơhai brơi khăm pơjrao tui tơđar ƀudah khăm ĕp lăng tơlơi ruă soh sel ƀiă biă mă ñu ha thun ha wŏt brơi mơnuih ƀôn sang, amăng anun hơmâo sa, dua čô mơnuih đing nao djru brơi amăng thun 2026 mơtăm, sit biă ñu lĕ kual ataih, asuek.