Jơnum min apăn bruă phun pơ ala mơnuih ƀôn sang dêh čar pơtong rơđah, hơdôm tơlơi rơkâo đĭ hơmâo čih pioh amăng hră lăi pơthâo, djop tơlơi rơkâo, tơlơi pơgôp mơ̆ng mơnuih ƀôn sang ruah khua, ngă atur yom biă mă kơ bruă krăp lăng pơphun ngă tui tơlơi phiăn mơ̆ng djop sang bruă kơnuk kơna.

Jơnum min apăn bruă phun pơ ala mơnuih ƀôn sang dêh čar rơkâo: Kơnuk kơna, Khua dêh čar, djop ding jum, anom bruă ƀơi gơnong dlông git gai pơčrâo bruă khut khăt pơsir djop tơlơi rơkâo sui thun, dŏ kơđông; kơtưn glăm ba amăng bruă mă mơ̆ng pô ngă khua, lir hơbit hăng boh tơhnal pơsir giong tơlơi rơkâo laih anun kiăng pơtong rơđah bruă mă glăm ba. Ăt amăng mông mă bruă hrơi jơnum blung a, ƀing khua mua pơgôp hiăp Hră pơtrun mơ̆ng sang bruă khua pơ ala mơnuih ƀôn sang dêh čar čih pơkra tơlơi pơtrun, bruă ngă, jơlan hơdră pơtrut kơtang hloh pơđĭ kyar gru grua hiam Việt Nam hăng tơlơi phiăn ngă yang rơbang hăng tơlơi đăo čih pơhrua glăi. Jơnum min apăn bruă phun pơ ala mơnuih ƀôn sang dêh čar sem glăi, pơsit hĭ Hră pơtrun akŏ pơdong 10 boh phường gah tơring čar Đồng Nai; akŏ pơdong ƀôn prong Đồng Nai yua dêh čar wai lăng tơdơi anai.