VOV4.Jarai - Lơ 18/8, ƀơi Ƀirô Kơnuk kơna, Khua dêh čar ơi Phạm Minh Chính tŭ jum Kơ-iăng khua dêh čar, Khua ding jum pơtom hiăp Kazakhstan Mukhtar Tileuberdi ƀrô tal ñu rai čuă sit nik dêh čar Việt Nam dong mơng lơ 17-18/8. Khua dêh čar ơi Phạm Minh Chính pơsit tong Việt Nam lêng kơ lăng yôm tơlơi rô nao rai giang mah hăng ngă hrŏm djop mơta hăng dêh čar Kazakhstan.

Kiăng kơ pơtrut kơtang dong bruă ngă hrŏm kơplah wah dua boh dêh čar pơ anăp anai, Khua dêh čar ơi Phạm Minh Chính rơkâo dua bơnah ngă tui pran gơgrong mơng Jơnum min pơlir hơbit Kơnuk kơna Việt Nam - Kazakhstan kơ bruă ngă hrŏm bơwih ƀong huă-sĭ mơdrô hăng boh thâo phrâo, bơkơtuai kĭ tơlơi pơkôl ƀu kiăng hră pơ-ar lơ̆m mut nao rai dêh čar brơi mơnuih ƀon sang dua bơnah kah hăng gir gum hrŏm tañ hơmâo jơlan rơdêh treng hăng glông por nao rai kơplah wah Việt Nam hăng Kazakhstan. Dua bơnah ăt pơlăi nao rai hơdôm bruă amăng jar kmar hăng amăng kual dua bơnah đing nao, amăng anun hơmâo bruă amăng kual ia rơsĭ Ngŏ.

Siu Đoan: Pơblang