VOV4.Jarai - Tŭ ư hăng tơlơi jak iâu mơng Khua mir sir Mi ơi Joe Biden, mơng lơ 11-17/5, Khua dêh čar Việt Nam ơi Phạm Minh Chính amra ba jơlan hlâo khua mua mơng Việt Nam nao jơnum khua mua pơprong kual ASEAN - Mi, nao čuă hăng mă bruă ƀơi dêh čar Mi hăng Sang gum hơbit djop dêh čar. Anai lĕ tal nao čuă dêh čar tač rơngiao blung a mơng Khua dêh čar ta ơi Phạm Minh Chính amăng hrơi blan Việt Nam dưi pơgang hĭ klin Covid-19 amăng đơ đam dêh čar, laih anun pok glăi djop mơta, pơphun jơlan hơdră hơkrŭ glăi tañ hăng pơđĭ kyar hơđong kjăp amăng bơwih ƀong huă-mơnuih mơnam, mut hrŏm jar kmar amăng djop mơta bruă, dơlăm tui dong, sit nik, tŭ yua. Amăng tal hyu mă bruă mơng Khua dêh čar ơi Phạm Minh Chính pơ dêh čar Mi tal anai čang rơmang lĕ hrơi mông kiăng pơtrut pơsur tơlơi rô nao rai hiam klă amăng bơwih ƀong huăi kơplah wah dua boh dêh čar.

Siu Đoan: Pơblang