VOV4.Jarai - Ding jum pơtom hiăp dêh čar pơsit tong Khua dêh čar ơi Phạm Minh Chính him lăng amra nao jơnum khua mua yôm phăn ASEAN hăng Mi pơ anăp anai. Ƀrô tal anai, Khua dêh čar ăt amra hơmâo hơdôm mông pơbưp nao rai ƀơi Mi. Pô pơtruh hiăp mơng Ding jum pơtom hiăp Lê Thị Thu Hằng brơi thâo: “Khua mir sir Mi hơmâo mơ-it hră jak iâu kơ Khua dêh čar ta hăng Khua mua hơdôm dêh čar kual ASEAN nao Jơnum khua mua yôm phăn kual ASEAN - Mi ƀơi Washington D.C pơ anăp anai.

Khua dêh čar ơi Phạm Minh Chính

Hơdôm dêh čar kual ASEAN  tŭ ư hăng hơdôm tơlơi rơkâo mơng Mi kơ bruă pơphun jơnum hăng djop bơnah glăk pơlăi nao rai kơ bruă bơdjơ̆ nao amăng Jơnum anai, amăng anun hơmâo hrơi mông pơphun jơnum. Khua dêh čar Việt Nam him lăng amra nao jơnum hăng hơmâo hơdôm bruă dua bơnah ƀơi Mi.

Siu Đoan: Pơblang