VOV4.Jarai - Amăng mông jơnum mă tơlơi pơhing phrâo tui tơđar mơng Ding jum pơtom hiăp pơphun tlam lơ 21/4, Pô truh pơhiăp Ding jum pơtom hiăp yă Lê Thị Thu Hằng brơi thâo Khua dêh čar ơi Phạm Minh Chính amra ba jơlan khua mua mơng Việt Nam nao pơhmư̆ Jơnum khua mua prong yôm kơplah wah Mi hăng ASEAN ƀơi Washington amăng blan 5 pơ anăp. Tal anai, Khua dêh čar Phạm Minh Chính amra nao čuă, ngă bruă ƀơi Mi hăng Sang gum hơbit djŏp dêh čar.

Khua dêh čar ơi Phạm Minh Chính

Tơdơi kơ rơbêh 27 thun pơtom hiăp nao rai, tơlơi rô nao rai Việt Nam hăng Mi hơmâo lu tơlơi pơplih hiam, klă nao rai kơ dua bơnah, pơpŭ nao rai tơlơi dưi wai lăng lŏn ia hăng bruă čar mơng dua bơnah. Hluai tui anun, Việt Nam čang rơmang hăng amra ngă hrŏm hăng gong gai Khua mir sir Mi ơi Joe Biden đah mơng pơtrut tui tơlơi rô nao rai dua bơnah, pơđĭ kyar dlăm hloh, klă hloh, kơjăp hloh, yua tơlơi rơngai, hơđong kơjăp ngă hrŏm hăng đĭ kyar mơng kual hăng ƀơi rŏng lŏn tơnah.

Siu H’Mai: Pơblang