Khua dêh čar ơi Phạm Minh Chính hơmâo lăi pơthâo hăng Kơ-iăng Khua mir sir, Khua dêh čar UAE kơ hơdôm boh tơhnal dêh čar Việt Nam dưi ngă, boh nik ñu amăng bruă bơwih ƀong huă. Tơdơi kơ jơnum bơkơtuai nao rai, dua čô khua hơmâo dŏ lăng pơsit brơi bruă kĭ pơkôl ngă hrŏm bơwih ƀong huă dua bơnah hlom bom, Hră pơkôl sĭ mơdrô rơngai blung a mơ̆ng Việt Nam hăng sa boh dêh čar Arab.

Anai lĕ, Hră pơkôl sĭ mơdrô rơngai yua hrơi blan bơkơtuai tañ hăng ƀiă hrơi blan hloh mơ̆ng Việt Nam, pơƀuh kơ bruă mă tơlơi kiăng khut khăt mơ̆ng khua mua dêh čar ăt kah hăng ding jum, anom bruă dua bơnah, kiăng pơđing tơhnal juă tơkai yak nao hrưn đĭ kơtang amăng bruă bơwih ƀong huă, sĭ mơdrô, tuh pơ alin kơ dua bơnah, pok rai sa jơlan prong, hơmâo boh yôm hơdor pioh amăng gru phun kơ Việt Nam dưi mut nao sĭ mơdrô amăng kual Trung Đông. Hăng boh yôm phun bơkơtuai nao rai djop mơta bruă, hră pơkôl anai sa tơlơi čang rơmang prong ba glăi boh tŭ yua ngă bơkơnar kơ dua bơnah amăng tơlơi bơwih ƀong huă.